Энэ жилийн дөрвөн тэгш ой давхцсан түүхт ойн төрийнхөө их баяр наадамд Архангай амгийн Хашаат сумын харьяат Чимэдрэгзэнгийн Санжаадамба аваргын даваанд арав даван түрүүлж, Монгол Улсын аварга цол хүртлээ.

Наадамчин олон талархаж байна. Ганцхан Архангайчууд гэлтгүй, түмэн олон Ч.Санжаадамбыг аварга болсонд баярлаад баршгүй нь.

Ийнхүү Ардын наадмын 22 дахь аваргаар тодорсон түүнд өнөө өглөө түрүү бөхийн бай шагнал болох "Land Cruiser 200” маркийн автомашины түлхүүрийг Чингисийн талбайд гардуулан өглөө.

Ёслолд хотын дарга С.Батболд, НИТХ-ын дарга Ц.Сандуй, "Тоёота Мотор” корпорацийн Зүүн бүсийг хариуцсан захирал Нанахара Хироаки, тус корпорацийн Монгол дахь суурин төлөөлөгч болон Тоёотагийн албан ёсны дистрибьютер компанийн удирдлагууд, Дархан аварга Г.Өсөхбаяр, Ч.Санжаадамба аваргын унаган багш З.Дүвчин багш нар нь болон ах дүү хамаатан садан нь оролцлоо.

Чимэдрэгзэнгийн Санжаадамба (1985-12-30) нь Архангай аймгийн Хашаат суманд төрсөн, үндэсний бөхийн улсын аварга цолтой.

Амжилт

• 2006 оны Дорноговь аймгийн наадамд 5 давж Аймгийн начин цол хүртсэн.

• 2008 оны Бүх цэргийн наадамд түрүүлж Цэргийн арслан цол хүртсэн.

• 2008 оны Булган аймгийн наадамд 6 давсан.

• 2010 оны Бүх цэргийн наадамд түрүүлж Хурц чимэг хүртсэн.

• 2010 оны Бар жилийн цагаан сарын барилдаанд аймаг, цэргийн цолтой бөхчүүдээс анх удаа түрүүлсэн

• 2011 оны улсын баяр наадамд 7 давж Улсын заан цол

• 2013 оны улсын баяр наадамд 5 давж Өсөх идэр чимэг тус тус хүртсэн.

• 2011 оны 11 сард Монгол бөх Гиннессийн номд бүртгүүлэхэд зориулсан 6002 бөхийн барилдаанд түрүүлсэн.

• 2012 оны 11 сарын 14-нд Эзэн Чингис хааны мэндэлсний 850 жилийн ойн барилдаанд түрүүлэж, 2012 оны 11 сарын 26-нд улс тунхагласны 88 жилийн ойд барилдаанд үзүүрлэсэн.

• 2014 оны улсын баяр наадамд 7 даван заан цолоо баталж саруул сайжрах чимэг

• 2015 оны улсын баяр наадамд 7 даван дахин заан цолоо баталсан чимэг хүртэв.

• 2016 оны улсын баяр наадамд 10 даван түрүүлэн Арслан ба Аварга цолуудыг давхар хүртэв.

О.Сайхан