-Юуны өмнө монгол түмэндээ үндэсний их баяр наадмын мэндийг хүргэе. Яамнаас томилогдсон ажлын хэсэг, эрдэмтэн судлаач, мэргэжилтнүүдийн баг хурдан морины хэмжээсийг тогтоосон. Ингэхдээ сэрвээний өндрийг азарга, соёолон 140 см, их нас 141 см, хязаалан 137 см, даага 127 см байхаар тогтсон юм. Харин үүнээс өмнө сэрвээний өндөр болоод үйлдвэрлэг байдлыг нь харгалзан үзэж та нарын эрлийз гээд байгаа зарим морь хасагддаг байсан юм.  Гэтэл энэ жилээс үйлдвэрлэг байдал буюу гадаад байдал, шинж тэмдгийг нь харгалзан үзэхээ больсон. Тухайн насандаа шүд, сэрвээний өндөр нь тохирч байвал уралдаж болно гэсэн үг. Энэ шийдвэрийг  Монгол улсын 60 мянган уяачийн төлөөлөл зургаадугаар их хурлаараа гарган танилцуулж УИХ тогтоол гаргаж баталсан. Үндэсний их баяр наадмыг зохион байгуулах комисс мэдээж хэрэг энэ шийдвэрийг баримтлан ажиллана.

 

-Би сая хэллээ. Энэ бол 60 мянган уяачийн санал хүслээр нэгтгэгдсэн асуудал. 93 жилийн ойн наадмын хурдан морины уралдаан ямар ч маргаан, хэл амгүй сайхан болж өнгөрлөө. Ер нь бол эрлийз морийг нүд нь хорсож, ад үзэх хэрэггүй юм. Энэ бол монгол газар, монгол хөрсөн дээр унаж тэнцсэн монгол адуу. Яахав англи ч юмуу өөр гаралтай сайн азарганы үр удам биз. Хэрвээ энэ адуу хүмүүс бидэн шиг оюун тархитай бол мөн ч их гомдож, их хэл ам хийх байх шүү. Эрлийз адуу нэг, хоёр, гуравдугаар үе гээд явна. Үе хойшлох тусам монгол шинж чанар нь илүү давамгайлдаг. Би ганцхан жишээ хэлье. Өчигдөр дааганы уралдааныг харж байхад 10 гаруй хувь нь монгол даага байна шүү дээ. Тэгэхээр энэ бол хөгжил, дэвшил, өөрчлөлт, хувьсал. Моринд хайртай түмэн олны хүлгээ чанаржуулж, чадваржуулах гэсэн  хүсэл нь ийнхүү давамгайлж ирлээ. Энэ бол хүн сэртхийх, хэл ам хийх асуудал огтоос биш юм.

 

-Хурдан морийг шинжих, шүдлэх, хэмжээ тогтоох асуудлыг хэдэн хүн суугаад гаргачихдаггүй юм. Олон жилийн судалгаа шинжилгээ, эрдэмтэн шинжээчдийн их хөдөлмөрийн үндсэн дээр яригддаг, шийдэгддэг асуудал. Энэ сарын 7-нд Стандарт хэмжил зүйн үндэсний төвөөс нэг стандарт гаргаж мөрдөхийг мэдэгдсэн. Үнэндээ цаг нь тулсан учраас бид хүлээж авч чадсангүй. Дараа жилээс тэр стандарт мөрдөгдөж магадгүй. Хэрвээ шийдвэр өөрчлөгдөхөөр бол бид мэдээж ард түмэндээ мэдээлнэ, танилцуулна.

Мөн "Монгол наадам” цогцолборын менежер н.Нямхүүгээс тодруулга авлаа.

-Манайх 30 ажилтан, дөрван техниктэй Хүй долоон худгийн наадмын тохижилт, усалгаа, хурдан морины гараа, барианы хэсгийг үйл ажиллагааг хариуцан ажиллалаа. Энэ жилийн наадамд бүтээн байгуулалт ихээр хийгдсэн учраас их онцлогтой боллоо. Авто зам, эко автобус гээд л наадамчин түмний тав тух, сэтгэл ханамжид нийцсэн ажлууд ихээхэн хийгдлээ. Цаг агаар хэвийн сайхан байсан учраас морь бараг эндсэнгүй. Ямар нэг маргаан, хэл ам гарсангүй, их сайхан наадам болж өнгөрлөө.

 

-Нийслэлийн ерөнхий төлөвлөгөөнд цогцолборын ажил бүтнээрээ тусгагдсан. Хөрөнгө оруулалт нилээн шаардлагатай ажил юм. Хэрвээ хөрөнгө оруулалтын асуудал шийдэгдвэл бүтээн байгуулалт үе шаттайгаар хийгдэж цогцолбор утгаараа ажиллаж эхэлнэ.