Сайн эцгийн нэрийг гурав худалдаж иднэ гэлцдэг. Орчин цагт сайн хүмүүсийн нэрийг бизнест ашиглан хөлжигсөд бий болсон гэлтэй. Саяхан төрийн шагналт, нэрт яруу найрагч Р.Чойномын "Нүүрний хэв" гэсэн ном олны гар дээр очлоо. Уг номын зохиогчийн ярихыг ч сонслоо. Өвөр монгол хүнээс авсан гэж ярьж байв. Нэрт найрагчийн маань нүүрийг хамгийн сүүлд хадгалж байсан хүн нь яруу найрагч, сэтгүүлч Р.Мөнхтөр гэдгийг олон хүн мэднэ. Р.Чойном агсны 80 жилийн ойгоор олонд дэлгэж үзүүлнэ гэж яруу найрагч Р.Мөнхтөр ярьж байсан удаатай.   

 

Гэтэл өөр хүний бизнесийн хэрэглэл болчихсон мэт санагдсаныг нуугаад яахав. Юутай ч Р.Чойномын нүүрний хэв нэг том баримт болон олонд ил гарч ирлээ. Тэгвэл Дорнодоороо бус Эрээнцаваараа алдаршсан нэрт яруу найрагч Д.Нямсүрэн болон 90-ээд оны яруу найрагчдын томоохон төлөөлөгч болсон яруу найрагч агсан Т.Содномнамжил нарын нүүрний хэв бас байдаг юм байна. Бурхан болоочдын ажилд оролцсон Ч.Комаров ярихдаа "Талийгаач нарын нүүрний хэвийг манай Дорнодын зураач Гантуяа авч байхыг харсан. Уг нь зураачид байх ёстой боловч тэр мөн л бурханы орон руу явчихсан. Эхнэр нь ч мөн адил. Зүг чигийг нь гаргаж өгөх хүн бол зураач талийгаачийн маань хүү, зураач залуу байх ёстой" гэсэн юм.

 

Юм мэддэг хүн болохоор талийгаач нарын нэгэн түүхэн баримтыг үлдээж чадаж. Харин дээрх хэвүүд одоо хаана хэнд байна гэдэг тодорхой бус байгаа ч удахгүй сайхан сэтгэлтэй хүмүүсийн буянаар олны нүдэнд ил гарах биз ээ.

 

О.Энхтүвшинзаяа