Хүний эрхийн үндэсний комисс энэ оны эхний хагас жилд зохион байгуулсан хяналт шалгалтын тайлангаа нэгтгэн гаргажээ.

Эхний хагас жилийн байдлаар тус комисс 12 аймагт ажиллаж, төрийн болон хувийн хэвшлийн 48 байгууллагад хүний эрхийн хяналт шалгалтыг хийж холбогдох байгууллага, албан тушаалтнуудад ХЭҮК-ын гишүүний шаардлага, зөвлөмжийг хүргүүлсэн байна.

ХЭҮК нь хүний эрхийн зөрчлийг илрүүлж, таслан зогсоох, зөрчигдсөн эрхийг сэргээн эдлүүлэх зорилгоор баривчлах, хорих, эрүүлжүүлэх байрууд, цэргийн байгууллага, анги, нэгтгэл, хүүхдийн болон ахмад настны асрамж, халамжийн байгууллагууд, сэтгэцийн эмнэлэг, сургууль зэрэг төрийн болон хувийн хэвшлийн аж ахуйн нэгж, байгууллагуудад шалгалт явуулж байна. Шалгалтын мөрөөр хүний эрхийг хангах, хамгаалах тухай комиссын гишүүний шаардлага, зөвлөмж боловсруулж, холбогдох байгууллага, албан тушаалтанд хүргүүлэн, хэрэгжилтэд хяналт тавин ажиллаж иржээ.

---