Аймгийн иргэдийн Төлөөлөгчдийн хурлын ээлжит Х хуралдаанаар Маршал Хорлоогийн Чойбалсангийн хөшөөг Тусгаар
тогтнолын талбайд босгох тухай асуудлыг хэлэлцлээ. Монгол улсын Өрлөг
жанжин, Хошой баатар, Маршал Хорлоогийн Чойбалсангийн морьтой хөшөө
босгох саналыг 2014 оны 11 сард "Тал нутгийн хөгжлийн төв” төрийн бус
байгууллагын Удирдах зөвлөлийн хурлаас санаачлан, Дорнод аймгийн
иргэдийн Төлөөлөгчдийн Хурлын дарга Р.Зоригтбаатар, аймгийн Засаг дарга
С.Ганбат, Хэрлэн сумын Засаг дарга бөгөөд Чойбалсан хотын захирагч
П.Мөнхтөр нарт албан тоот хүргүүлсэн байна. БНМАУ-ын Бага хурлын
тэргүүлэгчдийн 44 дүгээр хурлаас Баянтүмэн хотыг Маршал нэрээр нэрлэх нь
ач холбогдолтой хэмээн үзэж, Ардын хувьсгалын 20 жилийн ойг
тохиолдуулан 1941 оны 07 дугаар сарын 10-ны өдөр Баянтүмэн хотыг
Чойбалсан хот хэмээн нэрийджээ. Маршалын хөшөөг анх 1946 онд Ардын
хувьсгалын 25 жилийн ойгоор Монгол улсын их сургуулийн урд байрлуулж,
дараа жил нь буюу 1947 онд Дорнод аймгийн хуучнаар аймгийн Ардын
депутатуудын хурлын гүйцэтгэх захиргаа буюу одоогийн Музейн урд талбайд
босгосон байдаг. Түүнээс хойш Маршалын мэндэлсний 110 жилийн ойгоор
түүний төрсөн нутаг Чойбалсан суманд хөшөө босгосон түүхтэй. Энэ жил
Өрлөг жанжин, маршал Хорлоогийн Чойбалсангийн мэндэлсний 120 жилийн ой
тохиож байгаатай уялдуулан түүний гэрэлт хөшөөг Дорнод аймгийн Чойбалсан
хотын төв цэг Тусгаар тогтнолын талбайн гол цэгт босгох нь Монгол улсын
цорын ганц Маршалаа алдаршуулах, Монгол улсын тусгаар тогтнолыг
тунхаглан, бэхжүүлэхэд оруулсан гавьяа, 1921 оны Ардын хувьсгал, 1939
оны Халхын голын байлдаан, 1945 оны чөлөөлөх дайнд манлайлан оролцсон
баатарлаг түүх, тусгаар тогтнолын үнэ цэнийг хойч үе, залуучууддаа
мэдрүүлэх, зөв ойлголт өгөх зэрэгт ихээхэн ач холбогдолтой.
Хөшөөний
нийт өндөр суурьтайгаа 6 метр, суурийн хоёр талд Ардын хувьсгалын анхны
долоогийн хурал хийж байгаа зураг, нөгөө талд Халхын голын дайны түүхэн
ялалтыг харуулсан зураг, урд талд нь "Эрхэмлэж яваарай хэмээн машид
итгэн эрх чөлөө, тусгаар тогтнолыг Та нарт үлдээв. Х.Чойбалсан” гэдэг
өгүүлбэрийг товойлгон дүрслэх ажээ. 1939 оны Халхын голын байлдааны
ялалтын парад хүлээн авч байсан түүхэн фото зургаар хөшөөний макетыг
хийлгэсэн бөгөөд уг фото зурагт Маршал Будённы бэлэглэсэн тоомсог
морьтой байсныг иргэдээс гаргасан саналын дагуу Монгол морьтой байхаар
оруулсан байна. Нийт зардлыг хиймэл чулуугаар урьдчилан тооцож үзэхэд 98
сая төгрөг болж байгаа бөгөөд суурийн цутгалт ороогүй байгаа болно.
Эдийн засгийн байдал хүнд байгаа өнөөгийн нөхцөлд Морьт хөшөөг хандиваар
босгох юм байна. Аймгийн ИТХ-аас энэ асуудлыг дэмжин баталлаа.
URL: http://www.choibalsan.mn/index.php?newsid=8539
Танд манай сайт таалагдаж байвал Like дарна уу. Танд баярлалаа
Танд мэдээ таалагдаж байвал Like дарна уу.
Сэтгэгдэл бичих