Сангийн сайд Ч.Улаан Засгийн газрын 11-11 төвд ажиллаж, энэ оны улсын төсөв, эдийн засгийн байдлын талаар иргэдийн асуултад хариуллаа.

Тэрбээр эдийн засагт амаргүй сорилтууд тулгарч байгааг энэ үеэр хэлсэн юм. Оны эхний улирал дуусахад улсын төсвийн орлого төлөвлөсөн хэмжээнд хүрээгүй. Үүнийг дэлхийн зах зээлд уул уурхайн бүтээгдэхүүний үнэ унасан, хөрөнгө оруулалт нэмэгдэхгүй байгаа, аж ахуйн нэгжүүдийн үйл ажиллагаа жигдрээгүйтэй холбон тайлбарлаж байв. Мөн өмнөх засгийн алдаатай бодлого руу "чихэх"-ээ ч мартсангүй.

Ингээд Сангийн сайд Ч.Улаан иргэдийн асуултад хэрхэн хариулсныг товчлон хургэе.
-Тендер шалгаруулалт танил тал, дарга даамал дагаж яваад байна. Үүнд Сангийн сайд хяналт тавих боломж байна уу?
-Тендер шалгаруулахад хууль журмаа чанга мөрддөггүй, танил тал хардаг, лоббинд автдаг явдал байна. Тендерийн хуулийг шинэчлэн баталснаар Худалдан авах ажиллагааны газар байгуулагдсан, тэнд тендер зарлагдаж байгаа. Мөн орон нутгууд тендер зарладаг. Өөрөөр хэлбэл, олон газар тендер зарлаж байгаа нөхцөлд гажуудал үүсч байгааг үгүйсгэх аргагүй. Цаашдаа тендерийг цахимаар хүлээн авахаар бэлтгэж байна. Бүх тендерийн материалыг цахимаар хүлээн авдаг болсон нөхцөлд маргаан арилна.

-Долларын ханш огцом өслөө, бууруулж болдоггүй юм уу. Үүнээс болж аж ахуйн нэгжүүд асар их алдагдал хүлээж байна?
-Долларын ханшийг зохиомлоор бууруулж болохгүй, чадах ч үгүй. Гол нь ханшийг бууруулахын тулд зөв бодлого хэрэгжүүлэх ёстой. Гэвч Монгол Улсын эдийн засаг дэндүү бэлэнчилсэн эдийн засаг. Бүх юмыг гадаадаас авдаг. Гурван сая хүн амтай, 45 сая толгой малтай хэрнээ сүүнийхээ 70 хувийг валютаар худалдаж авч байна. Ийм байдлаас салах ёстой, тэр ч үүднээс Засгийн газар экспортыг дэмжих, импортыг орлох бүтээгдэхүүнд хөрөнгө оруулалт хийнэ гэдгээ зарласан.  Зарим  нэг нааштай үзүүлэлтүүд гарч эхэлсэн. Нэгдүгээр улиралд ямартай ч гадаад худалдааны алдагдал багассан, төлбөрийн баланс тэнцвэржих хандлагатай байна. Цаашдаа экспорт нэмэгдээд импорт багасаад ирэхийн цагт валют бий болно.

-Төсвийн орлого бүрдэхгүй байна гэх ч төсөв ерөнхийлөн захирагч нар хөрөнгөөр "тоглож" байна. Үүнд Сангийн яам хяналт тавимаар юм.
-2013 оноос эхэлж төсвийн цоо шинэ тогтолцоонд шилжсэн. Төсөв санхүүгийн эрх мэдлийг орон нутагт шилжүүлж байгаа. Тэгэхээр орон нутаг, төсөв ерөнхийлөн захирагч нар бүх мэдээллээ ард иргэдэд нээлттэй байлгах ёстой. Тэр цагт төсвийн гүйцэтгэлд  ард иргэд хяналт тавих бололцоо бүрдэнэ. Түүнээс Сангийн яам бүх байгууллагаар явж хянах бололцоогүй.

-Цалин, тэтгэврийг дахиад нэмэх бололцоотой юу. Нэмэгдэл чамлалттай байна?
-Цалин, тэтгэврийг нэмэхэд 200 тэрбум төгрөг зарцуулах хууль батлагдсан. Тэтгэврийг нэгдүгээр улиралд багтаагаад нэмсэн, цалинг үе шаттай нэмэгдүүлж байгаа. Нэмэгдлийг чамлаж байгаа, гэхдээ Засгийн газар бодитой нэмэгдэл болж очиход нь анхаарч байна.

-Тев банк 50 мянган төгрөгийн дэвсгэрт гаргана гэх юм. Үнэн үү?
-50 мянгатын дэвсгэрт гаргах асуудлыг судалж байна. Гол нь эдийн засгийн үр ашиг талаас нь харах учиртай.

Б.СЭЛЭНГЭ

URL: http://www.choibalsan.mn/index.php?newsid=1030