Уул уурхайн яамнаас 2015 оны эхний хагас жилд хийсэн ажлын талаар өнөөдөр тус яамны удирдлагууд мэдээлэл хийлээ. 2015 онд УУЯ Гацууртын ордыг стратегийн ордод хамруулах тогтоолын төслийг боловсруулж, УИХ-ын чуулганы нэгдсэн хуралдаанаар батлуулсан байна.

 

Улмаар тус ордын төрийн эзэмшлийн хувь тогтоох тухай тогтоолын төслийг боловсруулж өргөн мэдүүлсэн боловч УИХ чуулганы нэгдсэн хуралдаанаар хэлэлцэх шаардлагагүй гэж үзсэн талаар Уул уурхайн сайд Р.Жигжид мэдээллээ.

 

Тэрбээр, Төсвийн тухай хууль, Хүний хөгжил сангийн тухай хуульд нэмэлт өөрчлөлт оруулснаар Ашигт малтмалын нөөц ашигласны төлбөр (АМНАТ)-ийн улсын төсөвт төвлөрч буй орлогын 30 хувь, хайгуулын болон ашиглалтын тусгай зөвшөөрлийн төлбөрийн орлогын 50 хувийг нийслэл, аймаг, сум, дүүргийн хөгжлийн санд төвлөрүүлэх болсон.

 

УИХ-ын энэ оны долдугаар сарын 09-ны хуралдаанаар Олон улсын хөдөлмөорийн байгууллагын "Уул уурхай дахь аюулгүй байдал, эрүүл ахуйн тухай” 176 дугаар конвенцид нэгдэн орох тухай хуулийн төслийг хэлэлцэн баталсан. Энэхүү конвенц нь уул уурхйн салбар дахь аюулгүй ажиллагаа, эрүүл ахуйн хэм хэмжээг тогтоож өгдөг бөгөөд төр, ажил олгогч, ажилчдын үүрэг хариуцлагыг тодорхой зааж өгсөн” гэлээ.

 

Уул уурхайн салбарын гадаад хамтын ажиллагааг өргөжүүлэх чиглэлээр бусад орноос Монгол Улсад суугаа элчин сайдууд, хөрөнгө оруулагч, бизнесийн төлөөлөлтэй уулзалт зохион байгуулсан.

 

Эдгээр уулзалтаар Монгол Улсын эдийн засаг, эскпортын тулгуур салбар болох уул уурхайн салбарт гадаадын хөрөнгө оруулалтын нэмэгдүүлэх талаар болон Засгийн газраас хэрэгжүүлж буй бодлого, үйл ажиллагааг дэлгэрэнгүй танилцуулсан.

 

Ингэснээр уул уурхайн салбарт хөрөнгө оруулах сонирхолтой аж ахуйн нэгжүүд нэмэгдэж, Монгол Улсын эдийн засгийн хөгжилд томоохон түлхэц үзүүлнэ хэмээн Р.Жигжид сайд мэдээлэлдээ дурьдлаа.