Дорнод аймгийн Матад суман дахь газрын тос олборлох чиглэлээр ажиллаж буй "Петрочайна Дачин Тамсаг” компа­нийн экспортын тос ачих хэсэгт  гал гарч нефть тээвэрлэгч найман машин шатаж, хоёр хятад ажилчин нас барсан хэрэг гарсан.

 

    Тэгвэл тус компанийн олборлолтын 19 дүгээр талбайн ачилтын хэсэгт гарсан галын улмаас нефтийн тээвэрлэлт нь  90 хувиар буураад байсан. Харин саяхан ачих хэсгийн байгууламжийн гэмтлийг засварлаж дуусчээ.  Үүнтэй уялдаад өнгөрсөн  сарын 18-нд 84 машин тээвэрт гарч байсан бол одоо  90 орчим  машинаар түүхий эдээ тээвэрлэж буй юм байна. Сэргээн засварлах ажил дууссанаас хойш өдөрт дунджаар  2125 тонн нефть тээвэрлэж  байгаа гэнэ.

 

   "Петрочайна Дачин Тамсаг" компанийн хувьд нийт 375 олборлолтын цооногтойгоос одоогоор 325-ынх нь үйл ажиллагааг хэвийн байгаа аж. Өнгөрсөн онд улсын хэмжээнд 686 мянган тонн газрын тос экспортолж, улсын төсөвт 191 тэрбум төгрөг төвлөрүүлсний 90 орчим хувийг "Петрочайна Дачин Тамсаг" компанийн газрын тосны нийлүүлэлт бүрдүүлээд байгаа юм байна. Ямартай ч компанийн үйл ажиллагаа хэвий байдалдаа орж байгаа бөгөөд дахин гал гарах аюулаас урьдчилан сэргийлэх арга хэмжээ авсан байх хэрэгтэй байгаа юм.

---