Энэ онд Чойбалсан хотыг ногоон хот болгох ажлын хүрээнд аймгийн Засаг даргын  захирамжаар 18 хүний бүрэлдэхүүнтэй ажлын хэсэг байгуулагдан 25 ажил бүхий төлөвлөгөө батлуулан   ажиллаж байгаа юм. Ажлын хэсэг гишүүдээ  4 дэд ажлын хэсэгт хуваан  гудамж, зам талбайд хийгдэх ажлуудыг хуваарилан авч  хариуцан ажиллаж байгаа бөгөөд үүнд нийтийн эзэмшил дэх 6  талбайд  хийгдэх ногоон байгууламжийн  ажлын зургийг бэлтгэж, цэцгийн үр, үрслэг модны суулгацын тоог гаргаж, талбайн хэмжээг тогтоосон байна.
Ногоон хот болгох аяны хүрээнд олон ажлыг хийж хэрэгжүүлж байгаа бөгөөд Политекникийн коллежоос санаачлан тус сургуулийн түншлэгч байгууллага болох Улаанбаатар хот дахь "Цэцэрлэгжилт” ххк-ний мэргэжлийн дендрологч, агрономи, цэцэрлэгч нараас бүрдсэн сургалтын багаар онол, дадлагад суурилсан сургалтыг 2014 оны 04 дүгээр сарын 10-11-ны өдрүүдэд зохион байгуулах байна.

Уг сургалтаар

• Ногоон байгууламжийг нэмэгдүүлэх, мод бут тарих зүлэгжүүлэх цэцгийн мандал байгуулах зураг дизайн гаргах технологийг эзэмшүүлэх
• Хот суурин газрын цэцэрлэгжүүлэлт /мод, бут сөөг тарих, зүлэгжүүлэлт хийх, түүний арчилгаа/,
• Нэг ба олон наст цэцэг, цэцгийн мандал,
• мод үржүүлэг, жимс жимсгэний аж ахуй, ойжуулалт
• Хот суурийн газрын төлөвлөлт, ландшафт
• Цэцгийн дадлага, цэцэрлэгжүүлэлтийн дадлага зэрэг ажлыг сургалтаар зааж эзэмшүүлэх юм.

Нийтийн эзэмшлийн гудамж,  зам талбайг цэцэрлэгжүүлэх ажлыг албан байгууллага, ААН-үүдэд хуваарилсан байгаа тэдгээр байгууллага, аж ахуй нэгжийн 70 гаруй ажилтан албан хаагчид тус сургалтад  оролцоно. Зөвлөгөө мэдээлэл авахыг хүссэн иргэд Политекникийн коллежийн номын санд хүрэлцэн ирж сургагч багш нараас зөвлөгөө авах боломжтой юм.

URL: http://www.choibalsan.mn/index.php?newsid=1233