УИХ–ын гишүүн Л.Эрдэнэчимэг өнгөрсөн сарын сүүлчээр Монгол Улсад айлчлал хийсэн Япон Улсын Ерөнхий сайд Ш.Абэгийн айлчлалын дараа "Өдрийн сонин”-д  ярилцлага өгөхдөө,  "Арванхоёрдугаар сарын эцсээр япончууд Тавантолгой- Сайншандын зүүн чиглэлийн төмөр замын ТЭЗҮ-ийн судалгааг дуусгана. Тэгэхээр 2016 оны хавар төмөр замын ажил эхлэх бүрэн боломжтой” гэж ярьжээ. Үүнд нь гайхаж, эргэлзсэн Японы Бүрэн Эрхэт Элчин сайд Т.Шимизү "Өдрийн сонин”-д өгсөн ярилцлагадаа  "Анх удаа ийм мэдээ сонсож байна. Санамж бичигт хугацаа заасан нэг ч заалт байхгүй” гэж сониноор дамжуулан залруулав.

 

 Манай зарим улс төрч  дотооддоо алдаршихын тулд  болчимгүй үйлдэл гаргаж, гадаадын түншүүдтэй хийсэн гэрээ хэлэлцээнд ороогүй мөртлөө чухал үүрэг гүйцэтгэсэн мэтээр элдэв мэдэгдэл хийдэг болсон нь үнэхээр таагүй хэрэг юм. Ийм учраас л туршлагатай дипломатчийн тэвчээр барагдаж, "Япон Улсын Ерөнхий сайдын айлчлалтай холбоотой буруу ойлголт хэвлэл мэдээллээр цацагдаж байгаад гайхаж сууна” хэмээсэн биз ээ.

 

 Ноён Элчин сайд Монгол Улсын Гадаад хэргийн сайдыг ч хөнгөхөн чимхэхээ мартсангүй, тухайлбал өнөөдрийн ярилцлагадаа, "Гадаад хэргийн сайд Л.Пүрэвсүрэн мөн ийм утгатай ярилцлага өгсөн байна лээ. Магадгүй андуурсан ч байж болох юм” гэсэн байна.

 

Ийнхүү манай улс төрчдийн бусдын гэрээг үл харгалзан барин тавин элдвээр ярих улстөрийн карьер хөөсөн оролдлогууд Монгол улстай харилцах гадныхны хөх инээдийг барж байгаа бололтой. Тиймдээ ч Япон Улсаас Монгол Улсад суугаа Онц бөгөөд бүрэн эрхт Элчин сайд Такэнори Шимизү гайхсан биз. Тэрээр бол манай ёс заншлыг сайтар мэддэг, монгол хэлтэй, монголд элэгтэй, товчхон хэлэхэд Монгол- Японы найрамдал, хамтын ажиллагаанд бодит хувь нэмэр оруулж байгаа хүн билээ. Япон хэмээх өндөр ёс жаягтай улсын, дээр нь Гадаад хэргийн салбарт он удаан жил ажилласан мэргэжлийн дипломатч энэ хүн зүгээр ч нэг амнаасаа үг унагахгүй гэдэг нь эргэлзээгүй.

Эх сурвалж WWW.BOLOD.MN

---