Улс орны эдийн засаг дампуурлын ирмэг дээр тулж, өдрөөс өдөрт өрийн дарамтанд орсоор байна. Эрх баригчид өөрсдөдөө ашигтай хуулиа батлуулахаар улайрч ард түмнийхээ жаргал зовлонг үл мэдэрч явна. Эцэстээ хямралын дарамт бухимдал болж хувирлаа. Харин эрх баригчид мэдсэн ч мэдээгүй юм шиг өнгөрсөөр л. Ядарч зүдэрсэн ард түмэн хоногийн хоол, зүсэм талхныхаа мөнгийг олох гэж юу л бол юу хийж явна.

 

Ажилтай орлоготой ирээдүй амлаж гарч ирсэн тэд өнөөдөр ажлаа алдаж, орлогоо хаалгаж байгаа ард түмнийхээ төлөө ганц үг ган гэж дуугарахгүй байгаа нь эмгэнэл гэлтэй.

Туйлдсан ард түмэн юу ч хийхэд бэлэн байна. Захаасаа авахуулаад өөрийгөө "зулын гол" болгож эрүүл мэнд, амь насаа золиосонд гаргаж сууна. Үүний нэг жишээ нь өнгөрсөн долоо хоног болсон "Эрдэнэс Тавантолгой" компанийн үйлдвэрчний эвлэлийн хороон дарга С.Эрдэнийн үйлдэл байв. Тэрбээр, мөр зэрэгцэн ажиллаж яваа 206 ажилчдынхаа төлөө өөрийгөө олны өмнө шатааж эсэргүүцлээ илэрхийлж, хорслоо "тайлсан" юм. Энэ үйл явдлыг монголчууд бүгд шууд хүлээн авч үзсэн. Цахим ертөнц, мэдээллийн шинэ эрэн зуунд амьдарч буй иргэд, хүүхэд багачууд хүртэл энэ үйл явдлаар "амьсгаллаа".

 

Уг үйл явдал нь нийгэмд сайн гэхээсээ илүүтэйгээр саар үр дагаврыг бий болгож байна. Хэн дуртай нь тоглоом шоглоом байдлаар "Шатаая", "Шатаачихна шүү", "Шатах ёстой бол шатъя" гэх зэргээр дээрх үйл явдлыг буруу талаас нь өөхшүүлж байгаа нь туйлын харамсалтай.

 

Өчигдөр ЭКСКЛЮЗИВ компанийн захирал Г.Майцэцэг хүртэл мэдээлэл хийхдээ "Манай компанийн дансыг хаах үед Ч.Сайханбилэг албаны хүмүүстээ компанийн дансыг нээх чиглэл өгсөн. Гэтэл өнөөдөр өөрчлөгдсөн зүйлгүй, компанийн маань данс хаалттай, хөрөнгийг битүүмжилсэн хэвээр байна. Үндэсний үйлдвэрлэгчид төрийн байгууллагын дарамтад орж, үүдээ барьж байгаа нь Шийдлийн Засгийн газрын буруутай үйл ажиллагаа юм. Тиймээс Ч.Сайханбилэг огцрох ёстой. Хэрэв огцрохгүй бол хувцсаа шатаана” гэсэн юм. Энэ бол иргэн Г.Майцэцэгийн муйхар үйлдэл байлаа. Татвараа төлөөгүй нь түүний буруу. Гэвч иргэний болон аж ахуйн нэгжийнхээ үүргийг биелүүлээгүй хэрнээ ийм үгийг хэлж, үйлдлийг хийж байгаа нь харамсалтай. Энэ бүхэн нь нийгмийн ухамсарт муугаар нөлөөлж буйг огтхон ч төсөөлөхгүй байгаа бололтой. Нийгэм, ард түмэн гэдэг бол мэдээ, мэдээлэлд итгэдэг хамгийн "гэнэн" бүлэг гэсэн яриа байдаг. Тиймээс энэ мэтийн үйлдлийг гаргахгүй байхыг сануулах нь зүйтэй. Таны ярьсан хэлсэн бүхэн бусдад буруу ойлголт төрүүлэх боломжтой гэдгийг алхам тутамдаа санах хэрэгтэй.

 

Муугаар нөлөөлж буйгийн нэг жишээг дурдахад өчигдөр Хан-Уул дүүргийн хоёрдугаар хороонд нэгэн иргэн өөрийгөө шатаахыг завдсан үйлдэл гарсан байна. Тус дүүргийн цагдаагийн хэлтэст "манай хүргэн өөрийгөө шатаах гээд байна" гэсэн дуудлага иржээ. Дуудлагын дагуу цагдаагийн алба хаагчид очиж шалгахад Ш гэгч нь саванд бензин авчран гэртээ болон өөр дээрээ асгаж, өөрийгөө гэрээ галдан шатаахыг завджээ. Дуудлагын дагуу очсон цагдаагийн албан хаагчид үйлдлийг шуурхай таслан зогсоож хэргийг ХУД-ийн цагдаагийн хэлтэст шалгаж эхэлжээ.

 

Хамгийн эхний жишээ бол энэ. Үүнээс хойш хэдэн ч удаа ийм зүйл болохыг хэн ч мэдэхгүй. Тиймээс олны өмнө өөрийнхөө болон албан байгууллагынхаа байр суурийг илэрхийлэх гэж байгаа бол ярьж буй зүйлийнхээ үнэ цэнийг байнга бодох цаг иржээ.

 

 

Г.Лхагваа

---