Хэрлэн сумын 10-р багийн иргэн Гантөмерийн Баттулгынх хорь гаруй хоногийн өмнө бул нэмж гурван ихэр хүүхэдтэй боллоо. Ийн Дорнод аймагт 21 жилийн дараа гурван ихэр мэндэллээ. Хүүхдүүдийн ээж Оюунномин хоёр дахь төрөлтөөрөө удам залгах гурван ихэр хөвгүүн төрүүлэв. Тэд 2,3, 2,4, 1,7 кг жинтэй төржээ. Хөвгүүдэд Баттүшиг, Батхишиг, Бат-Орших хэмээх нэр хайрласан байна. Ихрүүд Улаанбаатар хотноо ЭНЭШТ амаржаад нутагтаа ирсэн байна. Одоогоор тэдний биеийн байдал хэвийн байгаа бөгөөд өрхийн эмнэлгийнхээ хяналтад байгаа гэнэ. Ихрүүдийн аав ээж МАК компанид ажилладаг ч одоогоор уурхай түр зогссон учир ажилгүй байна.

 

Баттулгынх 10 дугаар баг, Хивсний хамгийн арын эгнээнд байдаг учир эмнэлэг үйлчилгээнээсээ зайдуу юм билээ. Эсгий гэрт амьдардаг тэдэнд хүүхдүүдээ тав тухтай өсгөх боломж муухан санагдсан. Энэ тал дээр өрхийн эмнэлгийнхэн болон багийн дарга нар санаа тавьж Их хурлын гишүүдэд дуулгасан дуулдана. Шинэ хуулиар ихэр тус бүрт нь 3 сая төгрөг олгох хуулийн заалттай гэж багийн Засаг дарга хэлсэн. Үүн дээр нь жаахан л дэмжээд өгөх юм бол байртай болох боломж харагдаж байгаа юм. Иймээс Дорнод аймгийн Сэтгүүлчдийн эвлэлээс санаачлан гурван хүүг байртай болгох уриалгыг нийт Дорнодчууддаа хандан гаргаж байна. Монголын үрс маш олон болтугай.

 

Хандивын данс: Гантөмөрийн Баттулга хүүхдүүдийн аав. ХААН банк: 5405576308