Өнөө үеийн домог болсон хөлбөмбөгчин Л.Мессигийн өмсгөлийн жирийн нэг цэнхэр тороор дуурайлган хийсэн бяцхан хүүгийн зураг олон нийтийн сүлжээгээр цацагдаж, олны хайрыг татаад байгаа. Энэ зураг алдарт хөлбөмбөгчний сэтгэлийг хөдөлгөж, хүүг олоод жинхэнэ өмсгөлөө бэлэглэхийг хүссэн юм. Ингээд сошиал ертөнцийг шуугиулсан Мессигийн хамгийн бяцхан фанатын эрэлд сэтгүүлчид гарч, BBC телевизийн "Trending” нэвтрүүлгийнхэн бусдаас түрүүлж олжээ.

Хүүг Муртаза Ахмади гэдэг, Афганистаны хөдөө нутагт амьдардаг эгэл жирийн тариачны хүү ажээ. Таван настай Муртаза хүү Мессигийн үнэнч хөгжөөн дэмжигч боловч гэр бүлийнхэн нь түүнд хүссэн өмсгөлийг нь авч өгч чадахгүй учир хаа сайгүй тааралдах цэнхэр уутыг ашиглах санаа төрсөн аж. Хүүгийн зургийг том ах нь авч, Австралид амьдардаг үеэл ах нь Facebook хуудсандаа нийтэлснээр ийнхүү олон нийтэд таржээ. Хүүгийн аавтай утсаар холбогдон ярилцлага авахад бяцхан Муртаза "интернэтийн од” болсноо айл хөршийнхнөөсөө сонсоод их баяртай байгаа хэмээн ярьжээ.

BBC-гийн дээрх нэвтрүүлгээс өмнө Иракийн "Курдистан” телевиз Хомин хэмээх хүүг дээрх зургийн эзэн хэмээн түүнтэй уулзаж, ярилцлага авсан ч тэр нь худлаа болж таарчээ.

                                                                                                                       Мессигийн жинхэнэ фанат

Эх сурвалж: ВВС
Б.Сэвжидмаа