Хятадын өвлийн спортын XIII наадам энэ сарын 20-ны үдээс хойш ШУӨЗО-ны Өрөмчид нээлтээ хийлээ. ХКН-ын Улс төрийн товчооны гишүүн, Төрийн зөвлөлийн дэд ерөнхий сайд Лиү Яньдүн нээлтийн ёслолд оролцож спортын наадам албан ёсоор эхэлснийг зарлажээ.

 

Нээлтийн ёслолын тоглолт "Цас мөсөнд хучигдсан Тэнгэр уул, нарны гэрэл цацарсан Торгоны зам” сэдвийн дор "Цас мөсний ерөөл", "Тэнгэр уулын сэтгэл”, "Хятад улсын мөрөөдөл” гэсэн гурван хэсгээс бүрдэж, амьжиргааны хүчээр дүүрэн үзэсгэлэнт сайхан Шиньжяныг харуулжээ.

 

Нээлтийн ёслолын үеэр Төрийн зөвлөлийн дэд ерөнхий сайд Лиү Яньдүн холбогдох тоног төхөөрөмжтэй танилцаж, тэмцээнийг сонирхон, тамирчид, дасгалжуулагч, шүүгчид, сайн дурынхан болон хэвлэлийнхний төлөөлөгчидтэй уулзаж, сар шинийн мэнд дэвшүүлжээ.

 

Тэрээр: - Энэ удаагийн өвлийн спортын наадам нь Хятад улс 2022 оны өвлийн Олимпын наадмыг зохион байгуулах эрхийг авсны дараа болж буй Хятадын анхны цас мөсний томоохон наадам бөгөөд 13 дугаар таван жилийн эхний жилд болох бүх Хятадын анхны спортын наадам болно. Мөн Хятадын зүүн хойд нутагт зохион байгуулдаг байсан өвлийн спортын наадмыг анх удаа баруун хязгаарын цөөнх үндэстний нутагт зохиож байгаа нь цас мөсний спортыг хөгжүүлж, эрүүл саруул Хятад улс, баян чинээлэг нийгмийг байгуулахад чухал ач холбогдолтой юм. Тэмцээнд оролцох тамирчид Хятадын спортын уламжлалыг уламжлан, ур чадвараа гайхуулж, спортын өндөр амжилт, оюун санааны баялаг ололттой болж, 2022 оны өвлийн олимпийн наадамд чадвараа сорин, туршлага хуримтлуулахыг хүсэж байна гэжээ.

 

Тус наадам 11 хоног үргэлжилж, 52 төлөөлөгчдийн багийн 1388 тамирчин оролцож, 97 алтан медалийн төлөө өрсөлдөнө.

Бэлтгэсэн: С.УРЬХАН 

---