Монгол Улсад анх мал эмнэлгийн мэргэжилтэн бэлдэж эхэлсэн ууган сургуулийн 90 жилийн ой удахгүй болно. Одоогийн нэрээр Дорнодын Политехникийн коллеж /хуучнаар Хөдөө аж ахуйн Техникум/ 2014 оны 9-р сарын 11-нд 90 жилийн ойгоо тэмдэглэх гэж байна.

Дорнодын ХАА Техникум /хуучин нэрээр/ анх 1924 онд Улаанбаатарын ойролцоо Биокомбинатад байгуулагдсан. Энэ бол Монгол Улсын мал эмнэлгийн мэргэжилтэн бэлтгэх анхны сургууль байлаа. Ардын засгийн газар 1924 онд Улаанбаатарын ойролцоо Сонгины буланд тус сургуулийг байгуулж, захирал, мал эмнэлгийн даргаар орос мэргэжилтэн А.А.Дудукаловыг томилон ажиллуулжээ.

Бичиг үсэг мэдэх төдий 18-24 насны 15 сурагчийг элсүүлэн суралцуулж, анхны хичээлээ дан байшин, 2 гэрт зааж эхэлсэн гэдэг. Одоогийн Биокомбинатын суурин дээр байгуулагдсан тус сургууль хэдэн удаа бууриа сэлгэсний эцэст Дорнод аймагт шилжин очсон байна.

Дорнодын Политехникийн коллеж нь 90 жилийн турш үйл ажиллагаагаа тасралтгүй явуулж ирснээрээ онцлогтой. Өөр ийм сургууль Монголд байхгүй. Зах зээлийн хүнд үед олон сургууль хаалгаа барьж байхад Дорнодын ХАА Техникум, ХАА ТМС нэгдсэн түүхтэй.

Бүх төгсөгч болон ажиллаж байсан багш, ажилчдад хандан 9-р сарын 11-нд болох 90 жилийн ойдоо хүрэлцэн ирэхийг Дорнодын Политехникийн коллеж урьж байна.

URL: http://www.choibalsan.mn/index.php?newsid=1454