Дэлхийн шилдэг жүдочидтой хамтран ажилладаг "Fighting Films” спортын кино, реклам үйлдвэрлэлийн газар "Монголын жүдо” хэмээх баримтат кино хийж эхлэх гэж байна. Уг кинонд Монголын жүдо бөхийн түүх, хөгжил, анхдагч, орчин үеийн төвшин, тив, дэлхийн хэмжээнд үзүүлсэн амжилт зэргийг дэлгэрэнгүй үзүүлэх ажээ. Энэ хүрээнд дээрх киноны багийнхан манай жүдочдыг Английн Бристон хотноо урьж зураг авсан. Баримтат киноны зураг авалтад "Fighting Films” компанийн брэндийн төлөөлөгч Монгол Улсын хөдөлмөрийн баатар, гавьяат тамирчин Х.Цагаанбаатар, дэлхийн аваргын мөнгөн медальт, гавьяат тамирчин Д.Амартүвшин, олон улсын хэмжээний мастер Д.Төмөрхүлэг нар оролцлоо.

 

Өөрөөр хэлбэл, дээрх гурван жүдочоор төлөөлүүлэн Монголын жүдо бөхийн хөгжлийг тодорхойлно гэсэн үг. Энэхүү кино нь ирэх наймдугаар сард Рио де Жанейро хотод болох зуны олимпийн өмнө албан ёсоор нээлтээ хийх тухай эх сурвалж дурдлаа. Киноны үргэлжлэх хугацаа 60 минут гэнэ. Одоогийн байдлаар "Fighting Films” компани нь дэлхийн 20 гаруй орны жүдо бөхийн хөгжлийн тухай баримтат кино хийжээ.

Б.ЗУЛ  /ҮНДЭСНИЙ ШУУДАН/

---