Умард Солонгос улс алсын тусгалт пуужин хөөргөсөн явдлаас долоо хоногийн дараа тус улсын эсрэг авах шинэ өргөтгөсөн хориг арга хэмжээнд АНУ-ын ерөнхийлөгч Барак Обама гарын үсэг зурлаа.

Тус улс цөмийн хөтөлбөрөө зогсоохоос татгалзсан бөгөөд өнгөрсөн долоо хоногт Конгрессоор хуулийн төсөл батлагдсан юм.

Хориг арга хэмжээгээр, тус улсын цөмийн цэнэгийг хөгжүүлэхэд шаардлагатай санхүүг таслан зогсооно гэж үзэж байгаа аж.

Тус хуулийн төслөөр, хориг арга хэмжээнээс гадна, Умард Солонгост үзүүлэх хүмүүнлэгийн хөтөлбөр хийгээд, радио нэвтрүүлэг дамжуулах сувгийг дэмжихэд 50 сая доллар зарцуулах боломжийг олгож байна.

Умард Солонгос энэ сарын эхээр, алсын тусгалт пуужин хөөргөсөн нь хориглосон пуужингийн технологийн туршилт байсан гэж олон улсын зүгээс шүүмжлэл дагуулсан юм.

Энэ талаар Умардын Үндэсний телевизээр, дэлхийн тойрог замд хиймэл дагуулыг амжилттай оруулсан гэж мэдээлж байсан юм.

Пуужин хөөргөсний маргааш өдөр АНУ-ын ерөнхийлөгч Обама хэлэхдээ: Энэ бол авторитар дэглэм. Энэ бол өдөөн хатгалга. Умард Солонгос НҮБ-ын тогтоолуудыг удаа дараа зөрчиж, цөмийн зэвсэг үйлдвэрлэж, пуужин хөөргөх системийг төгс болгохоор хичээж байна гэсэн юм.

Өмнөд Солонгосын зүгээс АНУ-тай пуужингийн довтолгооноос хамгаалах системийг байршуулах талаар яриа хэлэлцээр эхэлсэн талаар ярьсан юм.

И.МӨНХЦЭНГЭЛ

---