Рио де Жанейро хотод болох зуны спортын XXXI наадамд оролцох Монголын шигшээ багийнхан одоогоор албан ёсоор 10 эрх аваад байна. Түүнчлэн олимпийн эрхийн болзлоо биелүүлсэн 14 тамирчин бий. Энэ удаагийн олимпод манай улс 30-аас дээш тамирчинтай оролцох зорилготой байгаа юм. Бид олимпийн наадамд оролцох тамирчдаа танилцуулж байна.

 

Энэ удаад хөдөлмөрийн баатар, гавъяат тамирчин О.Гүндэгмаагийн тухай товч мэдээлэл хүргэе. Тэрбээр Манголын тамирчдаас хамгийн түрүүнд олимпийн эрхээ авсан юм. Зуны спортын нааданд хамгийн олон удаа оролцсон тамирчин хэн бэ гэвэл спорт сонирхогчид маргаангүй О.Гүндэгмааг нэрдэх биз. Тэрбээр зургаа дахь олимпийн наадамдаа өрсөлдөхөөр бэлтгэлээ базааж байна. 15 настайгаасаа буудлагын спортоор хичээллэж эхэлсэн тэрбээр 1996 оны Атлантын олимпод анх оролцсон байдаг.

 

Тухайн үед 18 настай байсан О.Гүндэгмаа баатар анхны олимпдоо шагналт VI байр эзэлж олны анхаарлыг татсан юм. Энэ цагаас хойш болсон бүх л олимпод Гүндэгмаа тасралтгүй оролцсон тэрбээр 2000,2004 оны олимпод дараалан дахин VI байр эзэлсэн нь медаль авах боломж байна гэдгийг харуулсан. Түүний мөрөөдөл 2008 онд биелсэн. Хийн гар бууны 10 метрийн дасгалд тун тааруу амжилт үзүүлж урам хугалсан ч спорт гар бууны 25 метрийн дасгалд алдаагаа засаж мөнгөн медалийи тавцанд зогссон. Буудлагын спортын хамгийн өндөр амжилтыг үзүүлээд зогсохгүй булган сүүлтэй байж араасаа хоёр алт, нэг мөнгөн медаль дагуулсан билээ. Тухайн үед монголчуудаас хамгийн түрүүнд олимпийн эрхээ авч байсан О.Гүндэгмаа энэ жил дахиад л манай тамирчдын салхийг хагалж Риог зорих тийзээ захиалсан. Тэрбээр одоо спорт гар бууны дасгалд дэлхийн чансаанд хоёрдугаарт эрэмбэтэй байна. Харин хийн гар буугаар 15 дугаарт бичигджээ. Түүний хувьд 2012 оны Лондоны олимпийн дараа их спортоос завсарлага авсан. Гэвч өнгөрсөн оны гуравдугаар сараас дахин бэлтгэлдээ орж гуравхан сарын дотор формдоо орсон байна. Улмаар Монголын тамирчдаас хамгийн түрүүнд олимпийн наадамд өрсөлдөх эрхээ авсан юм.

О.Гүндэгмаагийн амжилтын товчоон
-1998 он дэлхийн аварга шалгаруулах тэмцээний багийн төрөлд хүрэл
-2006 он. ДАШТ-ий хувийн төрөлд хүрэл
-2002 он. Азийн наадмын хүрэл
-2006 он. Азийн наадмын хүрэл
-2014 он. Азийн наадмын хүрэл
-Азийн аваргын алт
-2005 он. Зүүн Азийн наадмын мөнгө
-2005 он. Ази-Африкийн наадмын хүрэл
-Дэлхийн цомын төлөөх шигшээ тэмцээний алт
-Дэлхийн цомын цувралуудын алт; мөнгө, хүрэл медаль тус тус хүртжээ.

---