Дорнод аймгийн өсвөрийн шатарчин Батцоожийн Амина Улаанбаатар хотноо зохион байгуулагдсан Шатрын өсвөрийн улсын аварга шалгаруулах тэмцээний алтан медаль хүртлээ. Тэрээр 9 өрөг тоглосноос нэг ч хожигдолгүй 8,5 оноо авч, нэг тэнцжээ. Энэхүү тэмцээнд оролцсон Дорнодын өсвөрийн шатарчид багийн дүнгээр 2-р байрт бичигдсэн байна.

Шатар бол оюуны спорт. Шатар тоглосон хүн аливаа асуудалд алсын хараагаар буурь сууртай хандаж, зөв үнэлэлт дүгнэлт өгч сурахаас гадна тэсвэр хатуужил суудаг. Манай аймаг шатрын спортын анхны мастеруудаас эхлээд улс, бүсийн хэмжээнд өндөр амжилт үзүүлсэн шилдэг тамирчдын өлгий нутаг юм.

УИХ-ын гишүүн Х.Болорчулуун тэргүүтэй Дорнод аймгийн Шатрын холбоо сүүлийн жилүүдэд энэ спортыг хөгжүүлэх, шинэ залуу тамирчдыг бэлтгэх чиглэлээр идэвхитэй үйл ажиллагаа явуулж буй. Өнгөрсөн жил л гэхэд тус холбоо Маршал Х.Чойбалсангийн мэндэлсний 120 жилийн ойд зориулсан "Чойбалсан-120″ тэмцээн, "Нэг аймаг-Нэг нүүдэл” багийн тэмцээнийг зохион байгуулснаас гадна өсвөрийн олон арван шатарчдыг улсын болон олон улсын тэмцээнд бэлтгэн оролцуулжээ.

Манай аймагт шатар сонирхогч хүүхэд багачуудын тоо өссөөр байгаагийн нэг илрэл нь "Чойбалсан-120″ тэмцээнд шилдэг 500 гаруй шатарчин хүүхэд залуус, насанд хүрэгчид оролцсон явдал юм. Уг тэмцээний шилдэг 34 сурагч Найрамдал зусланд амарсан бол Ахлах насны шилдэг 2 сурагч ОХУ-ын Москва хотоор аялаад ирсэн. Дорнодын шатарчдын энэ жилийн амжилтыг Д.Дүүрэнжаргал эхлүүлж, Шатар сонирхогчдын улсын аваргаас 3-р байр эзэлсэн тухай бид мэдээлж байсан.

Өсвөрийн улсын аваргаар тодроод буй Б.Амина охин энэ жил 15 настай. Шатрын өсвөрийн улсын аваргын алтан медалийг 21 жилийн дараа аймагтаа ахин авчирч буй нь энэ ажээ. Тэрээр өнгөрсөн долоо хоногт Завхан аймагт зохион байгуулагдсан Монголын бүх ард түмний спортын XIV их наадам, Монгол Улсын аварга шалгаруулах шатрын шигшээ тэмцээний 6-р байрт шалгараад байсан юм.

Б.Амина одоо Улсын насанд хүрэгчдийн  шигшээ багийн бүрлэдхүүнд багтаж, 3-р сарын 20-оос АНЭУ-д болох Олон улсын тэмцээнд оролцохоор бэлтгэж байна. Мөн энэ сарын сүүлчээр ОУШХ-оос Олон улсын их мастер цолоо хүлээн авах ажээ.