Харин энэ долоо хоногт буюу баярын өдрүүдэд дараах арга хэмжээ болно. Тоймлон хүргэвэл:

2016.03.14-ний 12.00 цагт "Монгол цэргийн музей"-д дундад зууны үед монгол цэргүүдийн эдлэж хэрэглэж байсан гархин хөө хуяг, дуулга, бамбай, нум сум бусад зэр зэвсгээс өнөөдрийн цэрэг эрсийн эдлэл хэрэглэл хүртэлхийг дэлгэн харуулна.

2016.03.15-ний 12.00 цагт "Монгол цэргийн музей"-н үүсэн байгуулагдсаны түүхт 50 жилийн ойн арга хэмжээ болно. 

2016.03.16-ны 11.30 цагт Нийслэлийн ЗДТГ болон Нийслэлийн цэргийн штабаас "Гурван үеийн уулзалт"-ыг Соёлын төв өргөөнд зохион байгуулна. Арга хэмжээнд УИХ, Засгийн газрын гишүүн, Батлан хамгаалахын сайд Ц.Цолмон, нийслэлийн Засаг дарга Э.Бат-Үүл нар оролцоно. Энэ үеэр дүүргийн цэргийн штабууд батлан хамгаалах төрийн үйлчилгээг үзүүлж, иргэдийн санал хүсэлтийг хүлээн авах юм байна. 

2016.03.17-нд нийслэлийн таван цэгээс жанжин Д.Сүхбаатарын талбай хүртэл Улаанбаатар цэргийн хүрээний анги, байгууллагын Үлээвэр хөгжимчид хөгжимтэй парад алхаж монгол цэргийн сүр хүчийг хөг, ая эгшигтэй хамт үлгэрлэн харуулна. Мөн энэ өдрийн 13.00 цагт төр, засгийн удирдлагууд, БХЯ, ЗХЖШ-ын удирдлагууд жанжин Д.Сүхбаатарын хөшөөнд цэцэг өргөж, Чингис хааны хөшөөнд хүндэтгэл үзүүлнэ. Үүний дараа 14.00 цагт нийслэлийн Соёлын төв өргөөнд баярын хурал, хүндэтгэлийн тоглолт болно. Арга хэмжээнд Ерөнхий сайд Ч.Сайханбилэг оролцоно. 

Мөн энэ өдөр Орхон аймагт Зэвсэгт хүчний 186 дугаар ангийн түүхт 80 жилийн ойн хүрээнд цэргийн ёслолын жагсаал, гардан тулааны үзүүлэх тоглолт, баярын хурал болно. 

Харин 2016.03.18-нд Монгол бөхийн өргөөнд хүчит бөхийн барилдаан, Офицеруудын ордонд ЦДБЭЧ-ын "Сүлд хийморийн дуулал" хүндэтгэлийн тоглолт зэрэг бусад арга хэмжээнүүд болно. 

URL: http://www.choibalsan.mn/index.php?newsid=15528