Өмнөд Суданд үүрэг гүйцэтгэж буй манай Зэвсэгт хүчний энхийг сахиулагчдын батальоны III ээлжийн алба хаагчид тус улсад ажиллаж буй гадаадын иргэдийг босогчдын халдлагаас аварлаа. Тус улсад НҮБ-аас UNMISS нэртэй ажиллагаа явуулж, омог хоорондын мөргөлдөөнийг энхийн замаар зохицуулахаар ажиллаж буй бөгөөд манай Зэвсэгт хүчний нэг батальон цагийн байдал тогтворгүй байгаа тус улсын иргэдийн амар тайван, аюулгүй байдлыг хамгаалах үүргээ нэр төртэй гүйцэтгэж байна. Үүний нэг тод жишээ нь өнгөрсөн долоо хоногийн даваа гаригт орон нутгийн болон гадаадын иргэдийг Монголын энхийг сахиулагчид халдлагаас хамгаалсан явдал болов.

Өмнөд Суданы Юнити мужийн Бентью хотын хойд талд үйл ажиллагаа явуулдаг ОХУ-ын хөрөнгө оруулалттай "Сафинат” компанийн газрын тос олборлох үйлдвэр рүү энэ сарын 14-нд зэвсэгт босогчид дайрч, эзэлжээ. Зэвсэгт босогчид орон нутгаасаа гадаадын компаниудын ажилтнуудыг нэн даруй гарч явахыг шаардсан гэнэ. Улмаар ОХУ-ын тав, Украин, Кени улсын тус бүр нэг, орон нутгийн гурван энгийн иргэн босогчдод барьцаалагдаж, тамлал хэрцгийлэлд өртөн гэмтэж, шархадсан тухай мэдээлэл хурандаа Б.Эрдэнэбат захирагчтай манай батальоныхонд иржээ. Монголын цэргийн багийн хариуцдаг бүсэд тухайн үйл явдал болсон учраас манай энхийг сахиулагчид түүнд оролцох шаардлагатай болсон байна. Тиймээс цэргийн багийн захирагчийн тушаалаар гэмтэж, шархадсан барьцааны хүмүүсийг суллах, эмнэлгийн яаралтай тусламж үзүүлэх тусгай ажиллагаа явуулжээ. Монгол цэргүүд тухайн цаг үед нэг хүн шиг байж, удирдлагын өгсөн тушаалыг нягт нямбай биелүүлж ажилласнаар шархдагсдыг аюулгүй газарт гаргаж, эмнэлгийн яаралтай тусламж үзүүлэн, НҮБ-ын мандатад заасан энгийн иргэдийг хамгаалах үүргээ нэр төртэй гүйцэтгэлээ. Энэ үеэр манай энхийг сахиулагчид ямар нэг хохирол амсаагүй гэнэ.

Энэ тухай мэдээллийг НҮБ-ын төлөөлөгч Жое Контрерас хэвлэлийнхэнд мэдээлсэн бөгөөд тэрбээр "ОХУ-ын газрын тосны үйлдвэрийн таван ажилтан шархадсан. Хоёрынх нь бие хүнд байгаа. Монгол Улсын энхийг сахиулагчид ажиллагаа зохион байгуулж, үйлдвэрийн 10 ажилтныг аварсан” гэжээ. Газрын тосны нөөц ихтэй Өмнөд Судан нь удаан хугацаанд Суданы бүгд найрамдах улстай газар нутгийн маргааны улмаас дайтаж байгаад, 2011 онд энхийн хэлэлцээрт хүрсэн юм. Харин өдгөө дотооддоо зөрчилдөөнтэй, омог, угсаатан хоорондын зэвсэгт мөргөлдөөн ихтэй байгаа аж. Тодруулбал, Бүгд Найрамдах Өмнөд Судан улсад өнгөрсөн оны арванхоёрдугаар сараас хойш омог хоорондын мөргөлдөөн ширүүсч, дотоодын зөрчил тэмцэл хурцдан, хүчирхийлэл газар авч олон мянган иргэн амь үрэгдэж, орон гэрээсээ дайжиж байгаа юм байна. Энэ онцгой, хүнд үед манай Зэвсэгт хүчний гурав дахь ээлжийн мотобуудлагын батальон шаардлагатай бүхий л арга хэмжээг цаг алдалгүй авч хэрэгжүүлж байгаа гэнэ. Манай батальоныхон тус улсын хойд хэсгийн өөрийн хамгаалалтын бүс дэх НҮБ-ын цэргийн баазын орчимд 9000 орчим энгийн иргэнийг байрлуулан хамгаалалтад аваад байгаа юм. ЗХЖШ-ын Энхийг дэмжих ажиллагааны хэлтсийн албаны хүнээс болсон асуудлын талаар тодруулахад "Энхийг сахиулагчид маань НҮБ-ын мандатаар хүлээсэн үүргээ амжилттай биелүүлж байна. Энэ ажиллагааны дараа тэдний сэтгэл санаа тогтвортой, эрүүл мэнд хэвийн, үүрэг гүйцэтгэх чадвартай байгаа.

Дашрамд дурдахад, Өмнөд Судан улсад явуулж буй НҮБ-ын UNMISS ажиллагаанд Монгол Улсын Зэвсэгт хүчин 2012 оноос 850 хүний бүрэлдэхүүнтэй батальон илгээж эхэлсэн. ЗХЖШ-аас цэргийн багуудтайгаа тогтмол холбоотой байгаа” гэв. Халдлагыг зогсоож, шархдагсдыг аюулг үй газарт гаргах үйл ажиллагааг амжилттай зохион байгуулсан хурандаа Б.Эрдэнэбат захирагчтай Монгол Улсын Зэвсэгт хүчний энхийг сахиулагчдад Өмнөд Судан улс дахь НҮБ-ын Энхийг сахиулах UNMISS ажиллагааны Цэргийн хүчний командлагч, хошууч генерал Далил Джонсон Саки "Хэрэгтэй цагт таны болон танай цэргүүдийн гүйцэтгэсэн шуурхай, шаламгай ажиллагаанд сэтгэл хангалуун буйгаа тэмдэглэн хэлэхэд таатай байна. Ялангуяа тэдний зоримог чанар, үүргээ чадварлаг гүйцэтгэсэн арга барил болон цагаа олсон, оновчтой хариу үйлдэл зэрэгт талархсанаа дахин илэрхийлье. Таны болон танай цэргүүдийн хийсэн энэхүү ажиллагаа нь үнэхээр бахархууштай үйл хэрэг байсан бөгөөд энэ чанараараа бусад орны цэргийн багуудыг араасаа үлгэрлэн дагуулж ажиллахыг та бүгдээс чин сэтгэлээсээ хүсэж байна” хэмээсэн талархлын захидал илгээжээ.

Г.ЦОЛМОН

URL: http://www.choibalsan.mn/index.php?newsid=1650