Энэ хаврын улс төр бантантайгаа хутгалдаж гүйцлээ. Эрх баригчид энэ сонгуульд дахин сонгогдохын тулд өөрсдөдөө дэндүү ашигтай сонгуулийн хуулийг өнгөрсөн оны "босго" дээр баталснаар энэ бүх зүйлийн эхлэл тавигдсан. Нөгөө талаас нь бодоод үзэхэд анхнаасаа л энэхүү гаргалгааг тэд хийчихсэн байсан гэсэн үг юм.

Тэгвэл яг одоо жижиг намууд болон "асуудалтай" нэр дэвшигчид, бие даагчид үүрээ эвдүүлсэн шоргоолж шиг бужигнаж байна. Хэн хаана, тэднийг дуудна тэнд нь шууд очоод л шургалахад бэлэн гүйцгээж байна. Мөн Цэцийн шийдвэртэй холбоотойгоор сонгуулийн хуульд өөрчлөлт оруулсантай холбоотойгоор намууд хүмүүсээ энэ удаагийн сонгуульд 76 тойрогт нэр дэвшүүлж өрсөлдүүлэхээр болоод байна. Тийм ч учраас аль сонгуульд ялах боломжтой бие хүнийг намууд бараг л "булаацалдаж" байх юм. Эхний ээлжинд одоогоор  Н.Батцэрэг, М.Сономпил нар АН-ыг "түшлээ".  Өчигдөр тэд шинэхэн намын бүлгийнхээ хуралд сууж харагдсан. Тэд ч яахав угийн л нааш цаашаа болж ирсэн хүмүүс.

Тэгвэл өнгөрсөн долоо хоногоос эхлээд УИХ-ын гишүүн С.Ганбаатарын асуудал яалтгүй олон нийтийн анхаарлыг татаж эхэллээ. ХҮН хэмээн нэг хэсэгтээ л бужигнуулсан С.Ганбаатарыг АН-д орж, улмаар АН-аас Дарханд нэр дэвших нь гэх яриа нэлээд хэдэн хэвлэлээр цацагдлаа. Тийм ч байх талтай. Учир нь энэ удаагийн сонгуульд Дарханаас АН-ыг төлөөлөөд дорвитой оролцох хүн байхгүй. Тиймээс АН-ынхан Дарханаас нэг ч гэсэн суудал авахаар хичээж байгаагийн илрэл нь С.Ганбаатар юм. МАН-аас Дарханд УИХ-ын гишүүн Д.Хаянхярваа, Монголбанкны дэд ерөнхийлөгч асан Б.Жавхлан нар өрсөлдөхөөр төлөвлөөд байгаа. Мэдээж тэдэнтэй үзэж ялалт байгуулах магадлалтай хүн нь С.Ганбаатар юм.

 Өчигдөр тэрбээр мэдээлэл хийж " "Хэвлэл мэдээллийн хэрэгслээр намайг Ардчилсан намд орж байгаа талаар багагүй мэдээллээ. МАНАН-д орсон дорвол үхсэн нь дээр. МАН, АН-ынханд С.Ганбаатар биш, түүнд итгэж буй хүмүүсийн итгэл хэрэгтэй байж болно. МАН, АН-ын шударга олон дэмжигч намайг хайрладаг. Гэхдээ би МАН, АН-д элсэхгүй" гэлээ. Мөн "Ийм мэдэгдэл хийсний төлөө тэд намайг гэмт хэрэгт холбогдуулна, сонгуульд оролцуулахгүй байх бүх арга хэмжээг авах байх" гэж хэлсэн нь олны анхаарлыг татлаа.

Тэгвэл үүнтэй нь холбогдуулан улс төрийн хүрээнийхэн зарим дүгнэлтийг хийж байна. Тэдний мэдээлж буйгаар АН-ынхан С.Ганбаатарыг намдаа ор хэмээн шантаажилсан бололтой. Тиймээс С.Ганбаатар өчигдөр мэдэгдэл хийж, улмаар сонгуульд оруулахгүй байж магадгүй гэдгийг хэлсэн гэнэ. Түүнийг нэр дэвшүүлэхгүй байх шалтгаан нь мэдээж боловсролоо худлаа мэдээлсэнтэй нь холбоотой аж. Тэрбээр, бакалаврын зэрэг хамгаалаагүй байж, магистарт суралцаж төгссөн. Мөн Хаан банкинд дадлага хийж байсан гээд бүх зүйл нь худлаа болж олныг цочирдуулсан. Энэ удаагийн сонгуулийн хуульд хуурамч бичиг баримт бүрдүүлсэн бол оролцуулахгүй байхаар шийдвэрлэсэн. Тиймээс эрх баригчид хэрвээ хүсэх л юм бол С.Ганбаатарыг хүссэн цагтаа улс төрөөс гаргаж дөнгөх юм.

Нөхцөл байдал хэцүүдэж дээрх шахаанаас шалтгаалж С.Ганбаатарыг АН-руу орох нь гэж таамаглаж байсан ч тэрбээр өөрөө орохгүй МАХН-д орж магадгүй гэдгээ хэлэв. Ийнхүү хүнд байдалд орсон С.Ганбаатар гишүүн "зовлон" нэгтэй Н.Энхбаярынхаа хаяаг түшихээр шийдсэн үү, үгүй юу . Н.Энхбаяр ч мөн адил сонгуульд оролцох эсэх нь тодорхойгүй яваа нэгэн билээ.

АН-ынханы төлөвлөгөө нь жижиг намуудыг "тоглоомын тойргоос" гаргаж, аль болох өөртөө уруу татахаар төлөвлөсөн бололтой.

Ч.Ган