"Манчестер Юнайтед”-ын ахлагч Уэйн Руни Английн шигшээгийн 2015 оны шилдэг хөлбөмбөгчөөр албан ёсоор нэрлэгдлээ. 30 настай Руни өнгөрсөн онд алдарт Бобби Чарльтоны шигшээ багийнхаа төлөө 49 гоол оруулсан амжилтыг ахиулж, Английн шигшээгийн түүхэн шилдэг мэргэн буучаар тодорсон. Мөн тэрбээр Евро-2016-гийн урьдчилсан хэсгийн тоглолтуудад 7 гоол оруулж, шигшээ багтаа их тус нэмэр болсон. 2015 оны хувьд шигшээ багтаа багтан найман тоглолтод гарснаас таван гоол оруулсан юм. 

Ингэснээр Руни хоёр жил дараалан шигшээ багийнхаа шилдэг хөлбөмбөгчөөр нэрлэгдэж буй бөгөөд нийтдээ дөрөв дэх удаагаа Оны шилдгээр шалгарч буй нь юм. Түүнд Оны шилдэг хөлбөмбөгчийн шагналыг Английн шигшээ багийн ерөнхий ивээн тэтгэгч Vauxhall компанийн төлөөлөгч гардуулжээ. Оны шилдэг хөлбөмбөгч шалгаруулах санал асуулга оролцсон фанатуудын 37 хувь нь Рунид саналаа өгсөн байна.