6 дугаар сарын 21-ний өдөр, Гадаад хэргийн яамнаа Япон Улсын Засгийн газрын буцалтгүй тусламжаар хэрэгжүүлэх "Хүний нөөцийг хөгжүүлэх тэтгэлэгт хөтөлбөр" төслийн хоёр орны Засгийн газар хоорондын Солилцох ноот бичигт Япон Улсаас Монгол Улсад суугаа Онц бөгөөд Бүрэн эрхт Элчин сайд Такэнори Шимизү, Монгол Улсын Гадаад хэргийн сайд Л.Пүрэвсүрэн нар гарын үсэг зурлаа.

　　　 Гарын үсэг зурах ёслолын арга хэмжээнд оролцсон Гадаад хэргийн сайд Л.Пүрэвсүрэн Японы ард түмэнд талархаж буйгаа илэрхийлээд "Уг хөтөлбөрөөр Монгол орны хөгжилд хувь нэмэр оруулах ирээдүйтэй төрийн албан хаагч залуусыг Японы их, дээд сургуулийн магистрантурт суралцуулдаг. Ирэх жилээс доктрантурын сургалт болон хувийн хэвшлийн боловсон хүчнийг уг хөтөлбөрт хамруулахаар болж байгаа юм. Эдгээр залуус эх орондоо буцаж ирээд тус бүрийн салбартаа ажиллаж, Монгол улсын хөгжил цэцэглэлтэд ихээхэн хувь нэмэр оруулна хэмээн итгэж байна" хэмээв.

　　　 Элчин сайд Т.Шимизү "Уг хөтөлбөрт 2001 оноос хойш нийт 262 залуус хамрагдан, Япон улсад магистрантурт суралцаад байна. Эх орондоо буцаж ирсэн төгсөгчид нь төрийн захиргааны байгууллага, их дээд сургууль, Монгол банк зэрэг нийгэм, эдийн засгийн олон салбарт үр бүтээлтэй ажиллаж байна. Мөн бид ирэх жилээс эхлэн илүү өндөр чадвартай боловсон хүчин бэлтгэх зорилгоор энэ хөтөлбөрт доктрантурын сургалтыг багтаахын зэрэгцээ хувийн хэвшилд ажиллаж буй япон хэлтэй боловсон хүчнийг хамруулах боломжтой болж байна. Уг хөтөлбөрийн хүрээнд боловсрол эзэмшсэн залуус Монгол улсын нийгэм, эдийн засгийн салбарын тэргүүн шугаманд ажилласнаар "Стратегийн түншлэл"-ийг бэхжүүлэхийг зорьж буй манай хоёр орны харилцан ойлголцол, найрамдалт харилцааг улам бүр гүнзгийрэн хөгжүүлнэ гэдэгт итгэж байна" хэмээн мэндчилгээндээ дурдав.

Төслийн танилцуулга

1. Төслийн нэр: "Хүний нөөцийг хөгжүүлэх тэтгэлэгт хөтөлбөр" (3 жил)
　　　　　The Project for Human Resource Development Scholarship (Three-year cycle)

(1) Солилцох Ноот бичгийн төслийн нийт өртөг: 231 сая иен 
　　　　　　　　　　　　　(ойролцоогоор 4 тэрбум 300 сая төгрөг) 
(2) Төслийн агуулга: 
　　　Уг хөтөлбөр нь Монгол улсын ирээдүй болсон төрийн албан хаагч залуу боловсон хүчнийг Япон улсын их, дээд сургуулийн магистрантурт тэтгэлэгтэйгээр суралцуулах зардлыг олгодог юм.

2. Төслийн нэр: "Хүний нөөцийг хөгжүүлэх тэтгэлэгт хөтөлбөр" 
　　　　(The Project for Human Resource Development Scholarship)

(1) Солилцох Ноот бичгийн төслийн нийт өртөг: 324 сая иен 
　　　　　　　　　　　　　　　　　　(ойролцоогоор 6 тэрбум төгрөг) 
(2) Төслийн агуулга: 
　　　Уг хөтөлбөр нь Монгол улсын ирээдүй болсон төрийн албан хаагч залуу боловсон хүчнийг Япон улсын их, дээд сургуулийн магистрантурт тэтгэлэгтэйгээр суралцуулах зардлыг олгодог юм.

URL: http://www.choibalsan.mn/index.php?newsid=17848