Евро-2016 тэмцээний шөвгийн 4-ийн эхний тоглолт Монголын цагаар урд шөнө 4:00 цагт боллоо. Энэ удаад Португал болон Уэйлсийн шигшээ багууд финалд шалгарах эрхийн төлөө тоглосон бөгөөд Португалчууд өрсөлдөгчөө 2:0-ээр буулгаж авлаа. Ингэснээр Португал "Евро-2016”-ын шигшээ тоглолтод шалгарлаа. Гоолуудыг 50 дахь минутад Роналдо, 53 дахь минутад Нани нар хийжээ.

Энэ тэмцээнд төдийлөн амжилт үзүүлж чадахгүй гэх хүлээлттэй байсан португалчууд ийнхүү алтан медалийн төлөө өрсөлдөхөөр болж, мэргэжилтнүүдийн таамгийг эвдээд байна. Португалын шигшээ багийн супер од Кристиано Роналдо энэ тоглолтод гоолдсоноор нийт 9 гоолтой болж, мэргэн буучдын жагсаалтыг тэргүүлж байна. Тэрээр энэ амжилтаараа Европын аварга шалгаруулах тэмцээнд хамгийн олон гоол оруулсан Мишель Платинигийн рекордыг давтлаа.

Мөн тэрээр Европын аварга шалгаруулах тэмцээний түүхэнд гурван удаа хагас шигшээд тоглосон анхны тоглогч болж байна. Тодруулбал, Кристиано Роналдогийн хамтаар Португалын шигшээ баг 2004, 2012, 2016 оны Европын аварга шалгаруулах тэмцээнүүдэд хагас шигшээд үлдэж байжээ. Эдгээрээс 2004 онд Португалд болсон Европын аваргад талбайн эзэд финалын шатанд шалгарсан ч Грект хожигдсоноор мөнгөн медаль хүртэж байсан юм.

Харин энэ удаад Португалын шигшээ алтан медалын төлөө Герман болон Францын багуудын хожсонтой нь тоглоно. Хагас шигшээгийн нөгөө тоглолт болох Герман, Францын багууд өнөөдөр шөнө 4:00 цагт "тулалдах” юм. 

---