Ардчилсан намын Үндэсний зөвлөлдөх хороо/ҮЗХ/-ны хуралдааныг өнөөдөр хийхээр наадмын өмнө тов тогтоосон. Уг хуралдааныг 18.00 цагт "Туушин” зочид буудлын Соёмбо танхимд хийхээр болсон байна. ҮЗХ-ны хурлыг хийхийн өмнө тус намын Гүйцэтгэх зөвлөл хуралдах ажээ.

Ардчилсан намын ҮЗХ-ны хуралдаанаар 2016 оны УИХ-ын сонгуульд ялагдсан шалтгаан, мөн намын дүрмийн шинэчлэлийг хэлэлцэхээр төлөвлөсөн. Мөн энэхүү хуралдаанаас Ардчилсан намын Их хурлын товыг тогтоох юм.

Мөн уг хуралдаанаар Ардчилсан намын шинэчлэлийн асуудал ялангуяа намын дүрмийн шинэчлэлийг гишүүдээр хэлэлцүүлнэ гэх мэдээлэл байгаа билээ.

Ардчилсан намын гишүүд, дэмжигчдийн зүгээс ҮЗХ-ны гишүүдийг дахин шинээр сонгох ёстой гэсэн байр суурь барьж буй. Энэ асуудал ч хөндөгдөх болов уу гэсэн хүлээлт байгаа. АН-ын ҮЗХ нь 213 гишүүнтэй.

Их хурлаас Ардчилсан намын дарга, ерөнхий нарийн бичгийн дарга нарыг тус бүр томилно. Тэр болтол З.Энхболдоос намынхаа тамгыг аваад буй УИХ-ын гишүүн Д.Эрдэнэбат Ардчилсан намын даргын үүргийг түр орлон гүйцэтгэх бололтой.

Үүний учир нь 2016 оны УИХ-ын сонгуульд Ардчилсан нам ялагдаж, УИХ-д есөн суудалтай болсон. Сонгуульд ялагдсаны хариуцлагыг намын хуучин дарга З.Энхболд хүлээж, албан тушаалаасаа чөлөөлөгдөх шийдвэрийг гарган, УИХ-ын гишүүн Д.Эрдэнэбатыг Ардчилсан намын даргын түр орлон гүйцэтгэгчээр томилсон нь тэр билээ.

Тэгвэл өнгөрсөн баярын амралтын урт хугацаанд АН-ыг шинэчлэх хүсэлтэй хүмүүс зүгээр суусангүй. Нийслэлийг удирдаж байгаад сонгуульд ялагдсан Э.Бат-Үүл тэргүүтэй 1990 онд байгуулагдсан ардчилсан хүчний намууд болох МоАН, МҮДН, МСДН-ын анхны дарга нар болох Да.Ганболд, Б.Баабар нар намаа шинэчлэх гурав уриалга гаргаад буй.

Мөн одоогоос хоёр жилийн өмнө байгуулагдсан АН-ыг шинэчлэх хөдөлгөөнүүд ч нэгдэн янз бүрийн төлөвлөгөө санал болгож, наадмын амралтын өдрүүдэд АН-ыг шинэчлэх тухай хэлэлцүүлгийг ч өрнүүллээ.

Энэ удаа АН бүтэц, зохион байгуулалтаас эхлэн удирдлагын багтаа үнэхээр шинэчлэл хийж чадах эсэхээс тус нам ирэх намар болох орон нутгийн сонгууль, ирэх жил болох Ерөнхийлөгчийн сонгууль, дөрвөн жилийн дараах УИХ-ын сонгуульд амжилттай оролцох эсэх нь шийдэгдэх ёстой. Тиймээс тус намын 100 гаруй мянган гишүүд, дэмжигчдийн хувьд намын шинэчлэл амин чухал асуудал мөн.

АН-ыг шинэчлэх тухай энэ яриатай зэрэгцээд тус нам дахь фракцууд өөр өөрсдийн эрх ашгийг хадгалж үлдэхээр тэмцэж байгаа тухай ч яригдсаар байна. Тухайлбал Алтангадасынхан биднийг намыг удирдаж байх үед АН бүх сонгуульд ялж байсан хэмээн их л додигор байгаа бол бусад фракцууд ч намын шинэчлэлийг өөр өөрсдийн эрх ашигт тохируулахаар хөдөлж эхэлсэн сураг бий.

Улсын баяр наадмын үеэр АН-ыг шинэчлэх асуудалд фракцууд хэрхэн оролцох тухайгаа хурдан морьдын уяанаас эхлээд гадаад, дотоодын амралтын газруудаар хэлэлцэж явсан тухай сураг, ажиг ч их байна.

Мөн ирэх жил бүрэн эрх нь дуусч халаагаа өгөх Ерөнхийлөгч Ц.Элбэгдорж ч намынхаа шинэчлэлд санаа тавьж эхэлсэн сураг дуулдаж байна. Тэрбээр намын хуучин лидерүүдийн нэг хэсэг болон залууст түшиглэж байгаа бололтой. Гэхдээ тэрбээр өнгөрсөн дөрвөн жилд АН-д төдийгүй, Монголын улстөрд хүч түрж ирсэн фракцуудын удирдлагуудад найдахгүй байгаа нь ч тодорхой болжээ.

Ийнхүү АН-ыг шинэчлэх, эсэх асуудал ойрын хэд хоногийн болоод Монголын улстөрийн амьдралд хурцаар тавигдаж, хэлэлцүүлэг өрнөж байна.

Харин тус намыг шинэчлэх эсэхийг өнөөдөр ҮЗХ-ноос гаргах шийдвэрүүд олон нийтэд харуулах юм.