Дарханы Төмөрлөгийн үйлдвэрийн захирлаар ажиллаж байсан өдгөө "Алтан дорнод Монгол” компанийн ерөнхий захирлын алба хашиж буй Т.Ганболдыг хууль хяналтын байгууллагынхан эрүүгийн хэргийн сэжигтнээр цагдан хорьж байгаад батлан даалтад гаргажээ.
Хэдхэн хоногийн өмнө манай цахим сонин түүнийг суллахаар эрх мэдэл бүхий хүмүүс хөдөлж эхэлсэн талаар мэдээлж байсан. Үнэхээр ч бидний мэдээлэл баттай болж, Т.Ганболдыг улсад өчнөөн төвөг учруулчихаад байхад манай хуулийнхан ийм хурдан хугацаанд суллаж чадлаа.
Хэргийг нэхэн сануулахад Дарханы төмөрлөгийн үйлдвэр нь ганбөмбөлгийнхөө бэлцэцийг Эрдэнэт үйлдвэр рүү шууд нийлүүлэх болзолтой. Гэтэл Т.Ганболд өөрийн үеэл дүү Эрмүүний нэр дээрх "Стантарт металс лимитэд” ХХК-тай гэрээ байгуулж, 20 мянган тонн ганбөмбөлгийг уг компаниар Эрдэнэт үйлдвэр рүү дамжуулсан байдаг. Ингэснээр 20 мянган тонн ганбөмбөлөг нийлүүлсэний зөрүү ашиг болох 3 сая ам.долларыг Т.Ганболд завшсаныг АТГ-аас илрүүлж 2013 оны зургаадугаар сарын 27-нд яллах дүгнэлт үйлдлүүлэхэр Нийслэлийн прокурорын газар руу илгээсэн ч Нийслэлийн прокорын хяналтын прокурор Алимаа хэргийг хэрэгсэхгүй болгож байв.
Т.Ганболд нь энхүү хэргийг үйлдэхдээ үйлдвэрийнхээ дотоод дүрмийг зөрчөөд зогсохгүй ТУЗ-дөө ч мэдэгдээгүй байна.
Үүнээс гадна Т.Ганболд "Дархан төмөрлөгийн үйлдвэр” ТӨХК-ийн захирлаар ажиллаж байхдаа 133 сая төгрөгөөр хүнд даацын хуучин машинууд худалдан авч улсад ихээхэн хэмжээний хохирол учруулсаныг АТГ илрүүлж, тогтоосон ч Нийслэлийн прокурорын газраас хэргийг хэрэгсэхгүй болгосон нь Монголын хууль хяналтын байгууллага авлигад идэгдсэнийг давхар илчилж өгсөн юм.
Мөн сүүлийн үед асуудал үүсгээд буй Ш.Батхүү, Д.Сугар нарын хэрэг ч Т.Ганболдыг улаан луйварчин болохыг харуулж байна.
Тодруулбал "Жаст” группийн ерөнхийлөгч Ш.Батхүү, Төрийн өмчийн хорооны даргаар ажиллаж байсан, өдгөө Үндсэн хуулийн цэцийн гишүүн Д.Сугар нартай хуйвилдан 10 сая ам.доллар луйвардсан хэрэг нь илэрсэн.

"Дарханы Төмөрлөгийн үйлдвэр” ТӨХК-иас "Жаст” ХХК нь их хэмжээний цувимал бүтээгдэхүүн худалдан авах хуурамч гэрээ байгуулан, баталгаа гаргуулж уг гэрээгээрээ Америкийн "HSBC” банкнаас 10 сая ам.долларын хөрөнгө босгож Төмөрлөгийн үйлдвэрийн дансаар дамжуулан авч залилсан, мөнгө угаасан хэргийг Дархан-Уул аймгийн Цагдаагийн газраас илрүүлсэн юм.
Ийнхүү улсыг аймшигтайгаар дампууруулж, мөнгийг хэдэн сая доллар, тэрбум тэрбумаар нь идэж чаддаг Т.Ганболд батлан даалтад гарлаа. Гэхдээ хуулийнхан зүгээр л суллаад явуулчихгүй, хэргийн эзэнд хийсэн үйл лайг нь үүрүүлнэ гэж найдаж байна.

mongolcomments

URL: http://www.choibalsan.mn/index.php?newsid=1833