Бразил улсын Рио Де Жанейро хотноо зуны XXXI олимпийн их наадам хөшгөө нээхэд бэлэн боллоо. Олимпын нээлттэй зэрэгцээд манай нэг тамирчин тэмцээндээ оролцох болсон нь Байт сурын Үндэсний шигшээ багийн тамирчин Ж.Гантөгс юм.

Тэрбээр өнөөдөр эрэгтэйчүүдийн ганцаарчилсан урьдчилсан харвааны төрөлд оролцоно. Энэ төрөлд 64 харваач оролцох ба урьдчилсан харваанд авсан оноогоор 1-64 байрт эрэмбэлэгдэнэ.

Ингээд наймдугаар сарын 8-нд хасагдах шатны харваа эхлэх ба эрэмбээрээ 1-т орсон тамирчин 64-т орсонтой, 2-т орсон нь 63-т орсонтой гэх мэтээр халз харвах юм.

Ж.Гантөгс "Лондон-2012" зуны XXX олимпийн наадмын байт харвааны тэмцээнд эх орноо төлөөлөн оролцож, урьдчилсан харваанд 699 оноо авснаар 19 дүгээр байрт бичигдсэн. Улмаар эхний тойрогт Энэтхэгийн тамирчин Рахул Банержеетэй өрсөлдөж, 0:6 (27-29, 24-25, 25-30) харьцаатай хожигдож байсан юм.

Ч.Амар                                                                                  zaluu.com

---