Монгол Улсын Ерөнхийлөгчийн ивээл дор зохион байгуулагддаг хөл бөмбөгийн "Үндэсний цом-2016" тэмцээн энэ сарын 8-14 хооронд Сүхбаатар аймагт зохион байгуулагдлаа. Энэхүү тэмцээн анх удаа орон нутагт болж байгаагаараа онцлог бөгөөд тэмцээний шагналын сан 30 сая төгрөгт багтжээ. Нийт 15 аймгийн шигшээ баг хоорондоо өрсөлдсөнөөс хагас шигшээд өнгөрсөн жилийн мөнгөн медальт "Увс” аймгийн шигшээ баг, энэ жилийн УАШТ-ний алтан медальт "Дорнод” аймагтай тоглоход эхний гоолыг Г.Хатансайхан тав дахь минутад оруулсан. Түүний энэ гоол Монголын шигшээ баг болон "Дорнод” аймгийн хаалгач Б.Батсуурийн тэмцээний туршид алдсан анхны гоол байлаа. Гэхдээ Г.Хатансайханий гоолоос ердөө ганцхан минутын дараа Б.Отгонбаатар чөлөөт цохилтоос хаалганы торыг хөдөлгөж, тоог тэнцүүлсэн. "Дорнод” аймгийн гоолын тоо үүгээр хязгаарлагдсангүй. Э.Отгонбаяр 30, 35 дахь минутад гоол оруулсанаар эхний үе 3:1-ээр өндөрлөсөн.
Хоёрдугаар үед ч "Дорнод”-ын давамгайлал үргэлжилж Б.Баяржаргал 45, Б.Отгонбат 49, З.Баярцогт 59 дэх минутад гоол оруулсан. Харин "Увс” аймгийн багаас О.Ганцоож 61 дэх минутад торгуулийн цохилтоор гоол оруулсанаар үндсэн цагт "Дорнод” 6:2-оор хожсон
Ингээд аваргын төлөө Орхон аймгийн багтай тоглож 3:0 тэмцээний ялагчаар н.Наранбаатар дасгалжуулагчтай н.Анхбаяр ахлагчтай Дорнод аймгийн хөл бөмбөгчид түрүүлж, "Үндэсний цом"-ын хошой аварга боллоо
Нийт 15 аймгийн 300 гаран тамирчид оролцсон тэмцээний шилдэгүүдийг шалгаруулахад зургаан тоглолтод хаалгандаа хоёрхон гоол алдсан Б.Батсуурь /Дорнод/ шилдэг хаалгачаар өрсөлдөгчгүй тодорсон. Мөнгөн медаль хүртсэн "Орхон” аймгийн шигшээ багийн ахлагч Б.Ганзориг шилдэг хамгаалагч болсон бол шилдэг хагас хамгаалагчаар "Дорнод” аймгийн З.Баярцогт шалгарлаа. Мөн тэмцээний турш нийт 13 гоолыг өрсөлдөгчийнхөө хаалганд шигтэгсэн Б.Баяржаргал /Дорнод/ шилдэг довтлогч боллоо. Шилдэг довтлогч Б.Баяржаргалд "Сүхбаатар” аймгийн Засаг Даргын орлогч дарга Т.Амарбаатар шилдэгийн шагналаас гадна хурдан удмын даага бэлэглэж баяр дээр нь баяр нэмсэн. Мөн тоглолт бүрийг үнэн зөвөөр дэнсэлсэн шилдэг сайн шүүгчээр МХБХ-ны хоёрдугаар зэрэглэлтэй шүүгч Т.Галдансүх тодорлоо.
URL: http://www.choibalsan.mn/index.php?newsid=18691
Танд манай сайт таалагдаж байвал Like дарна уу. Танд баярлалаа
Танд мэдээ таалагдаж байвал Like дарна уу.
Сэтгэгдэл бичих