УИХ-ын 2016 оны сонгуульд АН ялагдсан тул намын даргаар ажиллаж байсан З.Энхболд огцорч буйгаа зарласан билээ. Үүнээс хойш тус намын Үндэсний Зөвлөлдөх Хорооны хурал гурван ч удаа товлогдсон ч тодорхой шийдэлд хүрэлгүй нэг удаа хуралдсан ба хоёронтоо хойшлоод байна.

 

 

Хамгийн сүүлийн үеийн мэдээллээр УИХ-ын гишүүн Ж.Батзандан, Д.Эрдэнэбат, С.Эрдэнэ, ЕТГ-ын дарга асан П.Цагаан нар АН-ын даргад өрсөлдөх нь тодорхой болжээ. Эдгээрээс УИХ-ын гишүүн Д.Эрдэнэбатыг АН-ын ҮЗХ-ы гишүүдийн дийлэнхи буюу Н.Алтанхуягийн фракци, МҮДН фракци тус тус дэмжиж буй юм.

 

Харин ЕТГ-ын даргаар МҮДН фракцийн албан ёсны тэргүүн Ц.Баярсайханыг томилсноор МҮДН фракци хоёр хуваагдаж ч мэдэх нөхцөл байдал үүссэн тухай эх сурвалжууд өгүүлж байна. Учир нь ЕТГ-ын дарга Ц.Баярсайхан АН-ын даргад фракци нэгт Д.Эрдэнэбатыг бус, ажлыг нь авсан П.Цагааныг дэмжих магадлал өндөр болсон аж.

 

Ц.Баярсайханыг Р.Амаржаргал, Б.Мэдрээ, Д.Бат-Эрдэнэ зэрэг тус фракцийн голлох лидерүүд дэмжинэ. Харин Д.Эрдэнэбат, Н.Батбаяр нар Н.Алтанхуягийн фракцийн дэмжлэгтэйгээр намын даргад өрсөлдөх боломжоо ашиглахын төлөө ажиллах гэнэ.Учир нь АН-ын ҮЗХ-ны гишүүдийн 65 хувь нь Алтанхуягийн багийнхан байдаг гэх. Гэхдээ энэ дэмжлэгийг сарниулахын тулд С.Баярцогт, Ч.Сайханбилэг нар ажиллах мэдэх бөгөөд энэ тохиолдолд П.Цагааны АН-ын даргаар сонгогдох магадлал ихсэх юм.

 

Мөн Нээлттэй АН хөдөлгөөн, УИХ-ын гишүүн Ж.Батзандан нарын тавьж буй шаардлага ёсоор АН-ын даргыг намын их хурлаар сонгосон тохиолдолд Н.Алтанхуягийн АН дахь нөлөө мэдэгдэхүйц буурахаар байгаа билээ. Дашрамд дурьдахад Н.Алтанхуяг хэрэв АН-ын даргаар Ц.Элбэгдоржийн хүн болж, өөрийнх нь фракцийг буланд шахах юм бол Н.Энхбаяр даргатай МАХН-тай нийлж, Эх орны төлөө намыг байгуулахаар ажиллана хэмээсэн тухай эх сурвалжууд өгүүлж буй юм.

 

П.Мандах

sonin.mn

---