Нүүрсний зах зээлийн нөхцөл байдал тааламжгүй байгаа хэдий ч "Эрдэнэс-Таван Толгой” ХК-ийн үйл ажиллагаа хэвийн явагдаж, туслан гүйцэтгэгч, хамтран ажиллагч талуудынхаа өмнө хүлээсэн үүргээ биелүүлж, нүүрсний олборлолт, экспортыг жил тутам нэмэгдүүлэн ашигтай ажиллаж байна.

Гэтэл "Эрдэнэс-Таван Толгой” ХК, БНХАУ-ын "Чалко Трэйдинг Хонконг Лимитэд” компани хооронд 2011 оны 7 сард байгуулсан гэрээний талаар зарим улстөрч бодит үнэнийг мушгин гуйвуулсан мэдээллийг улс төрийн зорилгоор тарааж байна.Тухайлбал, "Эрдэнэс-Таван Толгой” ХК, БНХАУ-ын "Чалко” компани хооронд байгуулсан гэрээний нөхцөлийг дордуулж, нэг тонн нүүрсийг 70 ам.доллараар зарж байсныг 38 ам.доллар болгон бууруулсан хэмээн УИХ-ын гишүүн Л.Энх-Амгалан үндэслэлгүйгээр шүүмжилж, олон нийтэд буруу ойлголт өгч байна.

Энэхүү гэрээг анх байгуулах үед нүүрсний суурь үнийг 70 ам.доллараар тохирсон нь тухайн үеийн зах зээлийн үнээс даруй 20 орчим ам.доллараар доогуур байсан юм. Түүнчлэн үнийг хятадын нүүрсний зах зээлийн үнийн дөрвөн индексийн өөрчлөлтийн дагуу улирал тутамшинэчлэн тогтоохоор заасан байдаг. Гэрээ байгуулснаас хойш нүүрсний үнэ тасралтгүй буурч 2012 онтой харьцуулахад 2013 онд нүүрсний үнэ дунджаар 40 орчим хувиар унасан.

Хэрэв гэрээнд нэмэлт өөрчлөлт оруулалгүй үнэ тогтоох дээрх механизмыг үргэлжлүүлэн мөрдсөн бол "Эрдэнэс-Таван Толгой” ХК "Чалко” компанид нийлүүлсэн нүүрсний тонн тутамд дунджаар 10 ам.долларын алдагдал хүлээх томоохон эрсдэлтэй тулгарсан. Иймд "Эрдэнэс-Таван Толгой” ХК-ийн Төлөөлөн Удирдах Зөвлөлийн шийдвэрийн дагуу экспортыг түр зогсоон "Чалко” компанитай хүнд нөхцөлд яриа хэлэлцээ хийж, харилцан ойлголцож, гэрээний үнэ тогтоох механизмд өөрчлөлт оруулсны үр дүнд ойролцоогоор 17 тэрбум төгрөгийн алдагдал хүлээхээс урьдчилан сэргийлж чадсан.

"Эрдэнэс-Таван Толгой” ХК 2013 онд Цанхийн баруун уурхайн үйл ажиллагааг эхлүүлж 2,5 сая тонн нүүрс олборлон тонн тутмыг 30 гаруй хувийн ашигтай борлуулсан. Түүнчлэн үйлдвэрлэлийн зардлыг багасгаж, Цанхийн зүүн уурхайд гаалийн хяналтын бүс байгуулж, нүүрсээ хятадын Ганц модны боомт хүртэл шууд экспортолсноор тонн тутмыг нь 60-65 ам.доллараар нийлүүлсэн.Энэ нь тээврийн зардлыг бууруулах, нүүрсний экспортыг нэмэгдүүлэхэд бодитой түлхэц болсон. Эдгээрийн үр дүнд өнгөрсөн онд тус компани үйл ажиллагаанаасаа 28,8 тэрбум төгрөгийн бодит ашигтай ажилласан юм.

"Чалко”компанитай байгуулсан гэрээний талаар үндэслэлгүй, бодит байдалд үл нийцэх мэдээлэл тарааж буй нь компанийн хэвийн үйл ажиллагаа, нэр хүндэд сөргөөр нөлөөлж, хоёр компанийн хамтын ажиллагаанд саад учруулж болзошгүй байгаад анхаарахыг хүсч байна.


"ЭРДЭНЭС-ТАВАН ТОЛГОЙ”ХК
2014.04.29

URL: http://www.choibalsan.mn/index.php?newsid=1986