ХБНГУ-ын канцлер Ангела Меркель ерөнхий сайдаар дахин томилогдохын тулд ирэх 2017 оны  есдүгээр сард болох сонгуульд өрсөлдөнө гэдгээ өчигдөр Берлин хотноо албан ёсоор зарлажээ. Өдгөө 62 настай Ангела Меркель 2005 оны арваннэгдүгээр сард Германы канцлераар анх томилогдсон юм. Тэрээр  Христийн ардчилсан холбоо, Христийн  социал холбооны эвслийг тэргүүлж 2005, 2009, 2013 оны Бундестагийн сонгуульд оролцож ялалт байгуулан улмаар Засгийн газрыг 11 жил тэргүүлж байгаа билээ.  

А.Меркель ням гаригт ирэх жилийн сонгуульд нэр дэвшин өрсөлдөнө гэдгээ зарлах үеэрээ "Өнгөрсөн 11 жилд Засгийн газраа удирдан зарим зорилтоо биелүүлсэн. Хэрэв ерөнхий сайдын тушаалд дахин томилогдвол засгаа цаашид хэрхэн явуулах тухай би тодорхой мэдэж байна” хэмээн хэлжээ. Тэрээр мөн "Энэ удаагийн сонгууль бол Германы их нэгдлээс хойшхи хамгийн төвөгтэй сонгууль болох юм. Учир нь олон нам бүлгийн шаардлагад зохицуулах, дүрвэгсдийн асуудлыг зөв бодлогоор шийдвэрлэх шаардлагатай байна” гэжээ.

Өмнө нь ХБНГУ-ын парламентын Гадаад бодлого хариуцсан хорооны дарга Норбер Рёттген CNN сувагт ярилцлага өгөхдөө Канцлер Ангела  Меркелийг ээлжит удаагаа Засгийн газрын тэргүүний төлөө өрсөлдөхөөр шийдсэн тухайд мэдэгдэж байсан нь ийнхүү батлагдлаа. Рёттген нь Меркелийг хариуцлагатай улстөрчийн хувьд өрнө дахины үнэт зүйлсийг хадгалахын тулд канцлерын суудлын төлөө өрсөлдөх болсон гэж мэдэгдэж байсан юм.

                                                                                                                                                eagle.mn

---