Өнгөрсөн долоо хоногт нийгмийг цочроосон хэд хэдэн хэрэг гарсан. Тодруулбал, жүжигчин бүсгүйчүүд биесээ халуун усаар түлэхийн зэрэгцээ цагдаагийн хошууч хүн амины хэрэгт холбогдсон байна.

ЦЕГ-ын Дэмжлэг үзүүлэх сургалт дадлагын төвийн  ахлах мэргэжилтэн, цагдаагийн хошууч А.Отгонбаяр эхнэрээ зодож, үхэлд хүргэсэн байж болзошгүй тул түүнд  бусдыг амиа хорлоход хүргэсэн гэх үндэслэлээр хавтаст хэрэг үүсгэж, цагдан хорих 461 дүгээр ангид саатуулжээ.

Энэ хэргийг шударгаар шийд­вэрлэнэ гэдэгт талийгаачийн гэр бүлийнхэн нь эргэлзэж байгаа  төдийгүй талийгаачийг нөхөртөө зодуулж амиа алдсан хэмээн үзэж байгаагаа сэтгүүлчдэд мэдэгдлээ.  Талийгаач эмэгтэй энэ сарын 18-ны 02.30 цагт Баянгол дүүргийн VIII хороонд байдаг "Нарлаг таун" хороололд,  дөрөв дүгээр давхарт байрладаг гэрийнхээ тагтнаас  унаж, амиа алдсан  гэнэ.

Хэрэг гарсан шөнө А.Отгонбаяр согтуу байсан бөгөөд эхнэрээ төрсөн эгчийнхээ дэргэд тарчлаан зодсоныг гурван хүүхэд нь гэрчилж  буй аж. Хохирогчийн аав Б.Жаргал "Миний ганц охин гэртээ нөхрийнхөө гарт харамсалтайгаар амиа алдлаа. Отгонбаяр 2007 оноос эхлэн миний охиныг байнга зодож,  сэтгэл санааны дарамтад байлгадаг байсан. Үүгээр үл барам хүүхдүүдийнхээ гуяны дотор тал гэх мэт биеийн  ил харагдахгүй газарт чимхэх, базах зэргээр зоддог байж. Зээ нар маань ээждээ "Аав биднийг зодсоныг  өвөө, эмээд хэлэх үү" гэхэд нь хориглож нөхрийнхөө  нэр төрийг бодож явсаар ийм байдалд хүрчээ.

Миний охины биед зодуур нүдүүрийн ул мөр байгааг харахад гадны нөлөөтэй амиа алдсан нь ойлгомжтой байна.  Нүүр, гар нь хөхөрсөн төдийгүй хүйтэн мэсээр гарыг нь  зүссэн байсан. Шүүх эмнэлгийн задлан шинжилгээний  хариу ирэх баасан эсвэл даваа гаригт гарахаар бүх зүйл тодорхой болох биз. Гурван хүүхдийн ээж амиа хорлох ямар ч үндэслэлгүй" хэмээн мэдэгдээд байгаа. Хэрэг мөрдөн байцаалтын шатандаа явагдаж байгаа аж.

www.mnews.mn

URL: http://www.choibalsan.mn/index.php?newsid=2134