Дорнод аймгийн Хөдөлмөр халамжийн үйлчилгээний газраас Засгийн газрын тогтоолоор шинэ бүтэц зохион байгуулалтанд орж Хөдөлмөр, халамжийн үйлчилгээний газар болон өргөжин хөдөлмөр эрхлэлт, нийгмийн халамжтай холбоотой төрийн бодлогыг орон нутагт хэрэгжүүлэх болсонтой холбогдуулан Хөдөлмөр эрхлэлтийн үйлчилгээний стандарт болон Нийгмийн халамжийн үйлчилгээ, чанарын удирдлагын тогтолцоог байгууллагадаа нэвтрүүлэх ажлыг эхлүүлж  сум хариуцсан мэргэжилтнүүдийн чадавх бэхжүүлэхэд сургалтын зохион байгуулж байна. Сургалтаар Дорнод аймгийн хөдөлмөрийн зах зээлийн өнөөгийн байдал, хөдөлмөр эрхлэлтийг дэмжих төсөл хөтөлбөрүүдийн хэрэгжилт, цаашдаа анхаарах асуудал, нийгмийн халамжийн үйлчилгээний хүртээмж, зорилтод бүлгийг тодорхойлоход анхаарах зэрэг асуудлуудаар мэдээллийг хөдөө суманд анхан шатанд ажиллаж байгаа сум хариуцсан мэргэжилтнүүддээ өглөө.

Мөн чанарын удирдлагын тогтолцоог байгууллагадаа нэвтрүүлэх зорилтыг тавьж энэ  хүрээнд Хувь хүний манлайлал, харилцааны ёс зүй сэдвээр мэргэжлийн сургалтын байгууллагын сургагч багш нараар нийт албан хаагчддаа мэдлэг олгох сургалтыг зохион байгуулж байгаа юм.Иргэдэд төрийн үйлчилгээг үзүүлж байгаа албан хаагчдын хувь хүний манлайлал, харилцаа нь байгууллагын амжилттай ажиллах нэг үндэс гэж тэд үзэж байгаа юм.

Дашрамд дурдахад Дорнод аймагт 20 гаруй мянган иргэд ажил хөдөлмөр эрхэлж төсөвт 8-9 тэрбум төгрөгийн төвлөрүүлдэг бол нийт хүн амын 30 орчим хувь нь халамжийн үйлчилгээг авч үүнд 7,8 тэрбум төгрөг зарцуулагдаж байгаа юм.Хөдөлмөр халамж үйлчилгээний газар хөдөлмөр эрхлэлт, нийгмийн халамжийн бодлогыг хэрэгжүүлэхдээ халамжийн хавтгайрсан бодлогоос татгалзаж зорилтод бүлгээ оновчтой тодорхойлох, зорилтод бүлгийнхээ иргэдийн хөдөлмөр эрхлэлтийг дэмжих замаар амьжиргааг нь сайжруулах чиглэлээр ажиллах юм. Олон хүн халамжийн үйлчилгээ авахаа больж ажил хөдөлмөр эрхэлдэг, ашиг орлоготой болгох нь тэдний зорилт юм.

dornodmedee.mn

---