Залуу малчдын өмнө тулгамдаж байгаа асуудлыг шийдэх, залуу малчдынхаа нэр хүндийг өсгөх, урам өгөх, тэдний нийгэмд оруулж байгаа хувь нэмрийг олон нийтэд сурталчлан таниулах зорилготойгоор зохион байгуулж байгаа "Баялаг бүтээгч залуу малчин” зөвлөгөөний нээлтэд Ерөнхий сайд Н.Алтанхуяг оролцож үг хэлэхдээ "Монголын 45 сая толгой мал сүрэг малчид та бүхний  хөдөлмөр зүтгэлийн үр дүнд өсч үржиж байгаа шүү” гэдгийг онцоллоо.

 

Монголчуудын  мал маллах арга ухаан, ёс заншил,  соёл уламжлалыг өвлөн тээж, баялаг бүтээж байгаа  малчин залуусыг  Ерөнхий сайд манай үеийн баатрууд гэж нэрлэлээ.

 

 Зөвлөгөөнийг зохион байгуулах ажлын хэсэг малчин залуучуудын төлөөлөлтэй урьдчилан уулзаж, шийдвэрлэвэл зохих ямар асуудлууд байгааг тодорхойлох үеэр  олон чухал санал санаачлага гарсан бөгөөд энэ бүхнийг зөвлөгөөний үеэр хэлэлцэж, шийдвэр гаргана.  

 

Залуу малчдыг дэмжих хөтөлбөр боловсруулах ажлын хэсгийг зөвлөгөөний үр дүнд байгуулж, цаашид яаж ажиллахаа тодорхойлно. "Баялаг бүтээгч залуу малчин” улсын анхдугаар зөвлөгөөнийг хоёр жил тутамд зохион байгуулж байхаар төлөвлөж байна гэж Ерөнхий сайд хэллээ.

 

Зөвлөгөөний үеэр  орлого нэмэгдүүлэх боломж, боловсрол-эрүүл мэнд, хөдөлмөрийн харилцаа-нийгмийн даатгал зэрэг хэлэлцүүлэг зохиогдох бөгөөд зөвлөгөөний уриалга болон Засгийн газрын тогтоолын төслийг Ерөнхий сайдад өргөн барих юм.