Дорнод аймгийн Иргэний нийгмийн байгууллага, ТББ-уудын чуулга уулзалт өчигдөр аймгийн Засаг даргын ивээл доор ЗДТГ-т болж өнгөрлөө. "Төр иргэний нийгмийн байгууллагын түншлэл 2014″ сэдвийн доор явагдсан энэхүү чуулганаар төрийн зарим чиг үүрэгт хамаарах ажлуудыг ИНБ, ТББ-аар гүйцэтгүүлэх боломж, аймаг орон нутгийн хөгжлийн төлөө хэрхэн хамтран ажиллах талаар зөвлөлдлөө. Манай аймгийн ИНБ,ТББ-ууд нь өнгөрөгч 10 дугаар сард бага хурлаа хийж Зохицуулах зөвлөлөө 9 хүний бүрэлдэхүүнтэйгээр байгуулсан юм. Харин энэ удаад зөвлөлийн гишүүд санаачлан сүлжээ байгууллагуудаа оролцуулж чуулганыг зохион байгуулжээ. ИНБ-ын зүгээс нийгмийн өмнө тулгараад байгаа хүндхэн асуудлуудыг шийдвэрлэх хүрээнд хамтран ажиллах 4 чиглэл гарган чуулганаар хэлэлцүүлсэн. Архидалт-гэмт хэрэг, Хяналт, хариуцлага, мэдээллийн ил тод байдлыг сайжруулах, Гэр бүл-нийгмийн хөгжил, Байгаль орчин гэсэн чиглэлүүдээр төртэй хэрхэн хамтран ажиллах талаар ярилцсан байна.

---