Хоёр Монгол хүн уулзаж, цагаас дээш ярихаараа хамаатан болчихдог гэсэн шог яриа бий. Өнөөдөр Монгол улсад дөрвөн өрх тутмын нэг нь гэр бүлээ цуцлуулж байна гэсэн статистик үзүүлэлт гарч, гэр бүл салалтын улмаас төрсөн эцэг, эхээ мэдэхгүй өсч буй хүүхдийн тоо олшрох төлөвтэй байгаа юм.

Цусан болон ясан төрлийн хамаатан саднаа мэдэхгүй хүүхдүүд насанд хүрмэгц хоорондоо гэрлэх, тэр бүү хэл нэг эцэг эхийн хоёр хүүхэд гэр бүл болохыг үгүйсгэх аргагүй ирээдүй биднийг хүлээж байна. Иймээс гэрлэлтээ бүртгүүлж буй иргэд хоорондоо удам угсаагаар холбоо хамааралтай эсэхээ тогтоолгож байх шаардлагатай хэмээн Хэрлэн сумын Засаг дарга үзэж байна.

Дорнод аймгийн Хэрлэн сумын Засаг дарга бөгөөд Чойбалсан хотын захирагч П.Мөнхтөр шинээр гэрлэж буй иргэдийг удам зүйн шинжилгээнд хамрагдахыг уриаллаа. Түүний уриалгад албадлагын шинж байхгүй ч алсыг харж, нийгэмдээ дохио өгөхийн тулд өнөөдрөөс анхаарч байх шаардлагатай гэдгийг хэлж байна.

Өнөөгийн байдлаар Чойбалсан хотод удам зүйн шинжилгээ авах ямар нэгэн лаборатори байхгүй. Харин иргэдийн дунд ийм шинжилгээ өгөх эрэлт хэрэгцээ үүсвэл зах зээлийн жамаар лабораториуд нээгдэх боломжтой гэлээ.

Ургийн бичиг хөтлөх, удмын баяр хийж хамаатан саднаа таньж мэдэх үзэгдэл сүүлийн жилүүдэд нэмэгдэж байгаа. Гэвч энэ нь үр дүн багатай бөгөөд удам зүйн шинжилгээ хийлгэх нь хамгийн зөв арга гэж Чойбалсан хотын захирагч үзэж байна. Иймээс шинээр гэр бүл бологсдыг удам зүйн шинжилгээ өгч, цус ойртолтоос сэргийлэн удмын сангаа хамгаалахыг уриалж байгаа аж.