Ч.ГАНТУЛГА

"Утасны анд”  Гавьяат жүжигчин И.Одончимэгтэй холбогдлоо. Тэрээр "Гэгээн муза-11” наадмаас "Сэрүүн хасын нууц” жүжгээрээ "Шилдэг эмэгтэй гол дүр”-ийн шагнал авсан билээ.

-Сайн байна уу. Шилдэг эмэгтэй жүжигчин болсонд тань баяр хүргэе?

-Баярлалаа. Танай сонины уншигчдад энэ өдрийн мэндийг хүргэе.

-Шагнал авах үедээ юу бодож байв?        

-Хамгийн эхэнд ээждээ л "баярлалаа” гэж хэлмээр санагдсан. Намайг юунд ч санаа зоволгүйгээр зөвхөн уран бүтээл хийх бололцоог өгсөн. Хэрэв тэр хүн байгаагүй бол би өдий зэрэгтэй амьдрахгүй байлаа. Мөн найруулагч Найдаадаа талархаж байлаа.

-Алаг нүдэн Одноо улам залуу эрч хүчтэй болсон шиг харагдсан шүү?

-Тийм бол үнэхээр сайхан байна. Залуу нас өөрөө дэндүү сайхан, бурхнаас өгсөн бэлэг юм. Бүсгүйчүүд минь цэцэг шиг эмзэг, турьхан ч гал цогтой, залуу насаараа өөрийгөө чимж яваарай. Мөн ганцхан олдох насаа хайрлаарай.      

-Улаан хивсний ёслолын үеэр зарим хүмүүс таныг дэндүү даруухан сонголт хийж гэж байсан?

- Би өөртөө таалагдсан хувцсаа л өмсөх дуртай. Миний өмссөн хослол биед эвтэйхэн, аятайхан санагдсан. Заавал хүнд, урт даашинз өмсөх албагүй шүү дээ.

-Гэхдээ та үнэхээр үзэсгэлэнтэй харагдаж байсан. Гоо сайхныхаа нууцаас хуваалцаач?

-Нууц байхгүй ээ. Өөрийнхөө арьсанд тохирсон гоо сайхны бүтээгдэхүүн хэрэглэдэг. Амрах үедээ арьсаа эрүүл байлгаж, будагнаас татгалздаг. Мөн аль болох эрүүл хүнс хэрэглэхийг хүсдэг юм.

-Жингээ яаж барьдаг вэ?           

-Үргэлж хөдөлгөөнтэй байхыг хүсдэг. Тэгээд ч жүжигчин гэдэг мэргэжил бид­нээс хөдөлгөөн, бэлт­гэл шаарддаг учраас тар­галалтаас айдаггүй. Хоолоо зохицуулаад сур­чих­вал бүр сайн юм билээ.

-Уран бүтээлийн хажуугаар бага охиндоо хэр зав гаргаж байна?

-Тоглолттой үед оройтож гэртээ харьдаг. Гэхдээ охин минь балчир байгаа учир аль болох хамт байхыг хүсч байна.

-Таны охин том болоод ээж, эгч шигээ жүжигчин болно гэвэл яах вэ?

-Үнэхээр хэлж мэдэхгүй юм. Тухайн үедээ л болох байх. Тэр бол охины минь хүсэл мөрөөдөл, хувь тавилан.