УИХ-ын гишүүн О.Баасанхүү ШШГЕГ-ын дарга, хурандаа Д.Ядам­доржийг огц­руу­лахыг шаард­сан албан бичгийг өн­гөр­сөн баасан га­рагт Засгийн газарт хүргүүлжээ. Тэрбээр Газрын тосны газрын экс дарга агсан Д.Амарсайхан цагдан хорих 461 дүгээр ангид хоригдож байхдаа амиа алдсантай холбогдуулан түүнийг огц­руулах ёстой хэмээн үзэж буй аж. Хэргийн гол учир нь "төрийн хамгаалалт”-д байсан Д.Амарсайханы үхэлд хэн буруутай вэ гэдэгт буй юм. Өөрөөр хэлбэл тухайн үеийн төр засаг бо­лон хяналт шалгалтын бай­гууллагууд эл хэргийг яагаад илрүүлэлгүй даамж­руулав, намын нөхөд бо­лон хамтран зүтгэгч на­раа хамгаалсаар байгаад өөрийнхөө амийг золигт гар­гачихав уу гээд асуудлууд ар араасаа хөвөрч байна.

Хэдийгээр тэрээр эрхээ хасуулан хоригдож байгаа ч эрдэнэт хүний амь нас, эрүүл мэндийг хорих 461 дүгээр ангийн удирдлагууд анхаардаггүйн нэг жишээ энэ гэж олон нийт үзэж байна.

Тухайлбал уг хэ­рэгт хол­богдуулж, тус хо­рих ангийн ерөнхий эмч Дархан­батад тангараг өргөсөн ч үүргээ биелүүлээгүй гэдэг үндэс­лэлээр эрүүгийн хэрэг үүсгэн шалгаж байгаа.

Мөн талийгаачийг эмч­лэгч эмч Отгонбаатарт ч хуулийн хариуцлага хүлээл­гэхээр болсон юм. Учир нь эмч нар талийгаачийн ар гэр болон өмгөөлөгчдөд нь "Дээрээс эмчлэхийг хо­риглосон” гэдэг үгийг тайлбар болгон хэлсэн үг гал дээр ус нэмсэн хэрэг болоод байгаа юм. Тиймээс эмч нарын хэлснээр дээрээс тушаал өгсөн тэр хүнийг олж хариуцлага тооцох нь илүү шударга явдал болно гэж үзэж байгаа учраас Д.Ядамдорж даргыг огцрох хэрэгтэй гэж үзэж буй юм билээ.

Өөрөөр хэлбэл төрийн хамгаалалтад хоригдож бай­­гаад амиа алдсан Д.Амар­сайханы үхэл хууль, шүүх прокорурын салбарт олон жилийн бугшсан идээ бээрийг илчилсэн гэж хэ­лэхэд нэг их хилсдэхгүй байх.

Уг нь тус газар хоригдож байгаа сэжигтэн амиа алдах нь битгий хэл түүний тол­гойтой үснээс ганц шир­хэгийг ч унагаах эрх хуу­лийнханд байдаггүй. Энэ бүхнээс харахад эх ба­ригчид талийгаачийг эмчилж байсан хоёр эмчээр туг тахиад өнгөрөхгүй гэд­гийг зарим нэг гишүүд ихэд эсэргүүцэж байгаагаа УИХ-ын чуулган дээр хүртэл хэлээд авна билээ.

Товчхондоо "Дээрээс өгсөн үүрэг” гэдэг үгээр халхавчилсан хүний эрхийг зөрчдөг явдлыг таслан зог­соох хэрэгтэй гэж үзсэн хэрэг.

Түүнчлэн өнгөрсөн оны гуравдугаар сард "Джитал” хамтлагийн ахлагч Ш.Бат­баяр буюу Бааварыг мөн л тус хорих ангид хоригдож байхдаа сахилгын камертаа гал тавьсны улмаас түлэг­дэж байсан.

Тухайн үед ШШГЕГ-аас Бааварын ар гэрийнхэн болон сэтгүүлчдэд зөрүүтэй хоёр тайлбарыг өгч олны гайхширлыг төрүүлж байсан юм. Тодруулбал "Гал гарах үед камер ажиллаагүй бай­сан” гэж гэрийнхэнд мэ­дэгдсэн мөртлөө сэтгүүлчдэд "Дотоод журмын дагуу бич­лэгийг олон нийтэд дэл­гэх хориотой” гэсэн юм.

Түүнчлэн Ерөнхий сайд Н.Алтанхуягт "Бичлэг алга болсон”, харин Хууль зүйн дэд сайд Э.Эрдэнэжамьянд "Тухайн үед бичлэг унт­раастай байсан” гэсэн үл мэдэгдэх тайлбаруудыг хийж байхад нь ШШГЕГ-ын дарга Б.Ядамдорж " Гал гарах үеийн бичлэг устсан байна билээ. Тиймээс бичлэгийг сэргээнэ” гэх зэргээр зө­рүүтэй олон мэдээллийг олон нийтэд хүргэж байсан юм. Юутай ч шоронд хүн шатдаг, үхдэг байдлыг тас­лан зогсоох гэж О.Баасанхүү гишүүн болон хэд хэдэн гишүүд ийнхүү түүнийг огц­руулахаар болсон байна.

Зүй нь хүний эрх, эрх чөлөөг хязгаарлаж байгаа тохиолдолд эрүүл мэндийг нь хамгаалах, эрүүл аюулгүй байх эрхийг төр хангах үүрэгтэй. Гэтэл төрийн хам­­­­­гаалалттай байранд эм­нэлгийн тусламж авч чадал­гүй нас барна гэдэг нь хүний эрхийг ноцтой зөрчсөн хэрэг.

Тухайлбал ХЭҮК-т эрүүл мэндээ хамгаалуулах эрхтэй холбоотой асуудлаар хорих ангиудаас олон гомдол ирдэг аж. Ялангуяа цагдан хорих 461 дүгээр ангиас он гарсаар найман удаа яг энэ төрлийн гомдол ирсэн байдаг.

Энэ бүхнээс харахад төрийн байгууллагынхан хү­­­ний эрх чөлөөг нь хяз­гаарлахдаа эрүүл мэндээ хам­гаалуулах эрхийг нь давхар хязгаарлаж байгааг талийгаачийн үхэл тодоос тод харууллаа.

Өглөөний сонин
Р.Саруул