Авлига болон албан тушаалын гэмт хэргийг НДЕГ-ын хэсэг албан ту­шаалт­нууд өнгөлж эхэллээ гэж олны ярих нь ортой аж. Тус газартай холбоотой хээл хахуулийн хэрэг маш олнон гарч өдгөө зарим нь зохих ялаа эдлэн хоригдож байгаа учир ийн ярьж буй хэрэг.

Тэгвэл энэ удаа Сон­ги­нохайрхан дүүргийн Нийг­мийн даатгалын хэлт­сийн эрх мэдэл бүхий таван албан тушаалтан хуурамч бичиг баримт үйлдэн сангийн хөрөнгөөс мөнгө завшсан хэргээр эрүүгийн хэрэг үүсгэн шалгагдаж байна.

Дээрх хүмүүс 90 гаруй хүний акт болон хувийн хэргийг хуурамчаар үйлдэн "Хөгжлийн бэрхшээл”-тэй хэмээн тэтгэвэр тогтоож өгч байсан нь илэрсэн юм. Түүнчлэн тэд энэхүү хууль бус ажлаа хийхдээ нэг иргэнээс доод тал нь 300-500 мянган төгрөгийн хахууль авдаг байсан нь хэргийн материалд бүртгэгдсэн аж.

Товчхондоо тэдний энэ­хүү хууль бус үйлдлээс болж урьдчилсан байдлаар Нийгмийн даатгал болон Тэтгэвэрийн санд 120 гаруй сая төгрөгийн хохирол учирсан байна. Мөрдөн бай­цаалтын явцад дээрх мөнгөн дүнгээс ч илүү тоо гарах магадлалтай гэдгийг эх сурвалж өгүүлсэн юм.

Мөн бидний олсон мэ­дээллээр эл хэргийг Сон­гинохайрхан дүүргийн Цаг­даагийн нэгдүгээр хэлтсийн мөрдөн байцаагч, дэслэгч Батзориг шалгаж байгаа юм билээ.

Хэрэгт хамгийн их орол­цоотой хүн нь тус дүүргийн Нийгмийн даат­галын ар­хивч Гэрэлмаа, эмч Оюун-Эрдэнэ нарын таван хүн холбогджээ.

Бид мэдээллийг тэнц­вэртэй байлгах үүднээс НДЕГ-ын мэдээллийн ажил­тан Адилзаяагаас асуу­хад "Манай ажилтнууд хэ­­рэгт холбогдсон гэж сонс­­сон. Гэхдээ энэ та­лаарх мэдээллийг Хя­налт шалгалтын дарга Ариунаа­гаас асуу” гэв. Түүний хэлсэнчлэн дээрх хүнтэй уулзах гэсэн боловч эзгүй байсан юм.

Баттай эх сурвалжийн мэдээлж буйгаар хэрэгт холбогдсон албан ту­шаалт­нууд хууль тогтоомж, эрх зүйн актыг зөрчөөгүй юм шиг далд аргаар үйлдсэн нь сая л илэрсэн аж.

Түүнчлэн өмнө нь тус газарт шалгалтын баг орж ажиллаж байхдаа хэд хэдэн зөрчил илрүүлсэн боловч тэд хуулийн хийдлийг ашиг­лаж тухайн үйлдэл нь гэмт хэргийн бүрэлдэхүүнийг хангахгүй байх тийм бо­ломжуудыг ашигласан бай­сан гэсэн үг.

Товчхондоо далд ар­гаар үйлдэгддэг энэ мэт хэрэгт холбогдогчид нь голдуу эрх мэдэл бүхий албан тушаалтан байдаг. Эрх мэдлээ хэрэгжүүлж бай­гаа хүнийг шалгахад гэмт хэргийн баримт, нотол­гоог устгах, бусад гэрч, холбогдогчтой сүлбэлдэх, хуй­валдах, нөлөөлөх замаар хэргийг замхаруулдаг гээд олон сөрөг зүйл байдаг тухай мөрдөн байцаагч нар ч хэлдэг.

Өнгөрсөн онд Дархан-Уул аймгийн Нийгмийн даатгалын дарга П.Баяраа, ерөнхий нягтлан бодогч Б.Хастуяа нар нь иргэдийн тэтгэврийн мөнгийг хувийн данс руу шилжүүлэн хүүг нь хуваан авч улсад онц их хэмжээний хохирол учруулсан хэрэг ч гарч байсан. Зовж зүдэрсэн ард иргэдийнхээ халаасыг сэгсэрч хувьдаа их хэмжээний мөнгө завшсан дээрх албан тушаалтнуудын нэр усыг дараагийн дугаартаа эрэн сурвалжилж мэдээллэх болно.

Үргэлжлэл бий...

Өглөөний сонин
Р.Саруул

---