Сүүлийн үед МУИС-ийг тойрсон хэл ам татрахгүй байгаа. Тодруулбал, МУИС-ийн захирал А.Галтбаярыг сургалтын төлбөрөөс гадна 166 оюутнаас 280 сая төгрөгийг хууль бусаар авсан хэмээн оюутнууд нь мэдэгдээд байгаа юм.  Түүнчлэн МУИС-ын зарим захирал А.Галтбаяр захиралтай хамтарч ажиллаж чадахгүй хэмээн мэдэгдэж ажлаас гарах өргөдлөө хүртэл өгөөд байгаа юм.  Энэ талаар БСШУ-ны сайд Л.Гантөмөр болоод МУИС-ын багш нарын холбооны тэргүүн Б.Болд-Эрдэнэ нарын байр суурийг сонслоо.

БСШУ-ны сайд Л.Гантөмөр:
- "Монгол Улсын дээд боловсролтой холбоотой шинэчлэл бол сүүлийн 2 жил нэлээн эрчимтэй хийгдэж байгаа.  Мэдээж шинэчлэл хийхэд цаг хугацаа хэрэгтэй. Мөн шинэчлэл рүүгээ явах замд олон үзэл бодол гарч ирнэ.  Зарим үед шинэчлэл хийж байгаа хүмүүс өөрсдийн санаа бодлоор явахаас өөр аргагүй зүйл ажиглагдаж байна.  Тэгэхээр хоорондоо нэлээн сайн ярилцах хэрэгтэй гэж яамны зүгээс хэлмээр байна.  Харин миний зүгээс цэвэр үр дүн шаардана.  Мэдээж хүүхдүүд арын хаалгаар сургуульдаа ордоггүй, аль болох сонголттой байх хэрэгтэй. Түүнчлэн хүн бүхэнд, таалагдах, боломж байхгүй.  Нэг үгээр хэлбэл, хүн бүхэнд албан тушаал өгч чадахгүй. Мөн маш цөөхөн хүмүүс нь хариуцлагатай ажиллаж, бусад нь докторынхаа ажлыг л хийдэг болох ёстой.  Харин өнгөрсөн хугацаанд 200 доктор байхад түүний 80 хувь нь дарга байлаа шүү дээ.  Тэгэхээр бид докторуудаараа илүү судалгаа хийдэг бүтэц рүү яваач гэдэг хүсэлтийг тавьж байгаа юм. Ер нь эрдэмтэд хоорондоо ойлголцохгүй зүйл их байна.  Үүнийг бид цаг хугацаагаар даван туулна гэсэн итгэл үнэмшилтэй байгаа. Харин МУИС-ийн захирал А.Галтбаяртай холбоотой зүйл дээр би өөр байр суурьтай байгаа.  Тэр оюутнуудын яриад байгаа асуудал бол 2011 оны шийдвэр. Тухайн үед сургуулийн удирдлага сургалтын төлбөрөө нэмсэн боловч авч чадаагүй юм билээ. Хуучин аргаар бол сургууль төгсөх үед бүх тооцоогоо хийдэг байж.  Өөрөөр хэлбэл 5000 орчим төгсөгчийн 1000 гаруй нь сургалтын төлбөрийн зөрүүг төлөөгүй өдийг хүрсэн.  Мэдээж сургууль удирдаж байгаа хүн нь тэр мөнгөө авья гэдэг л асуудал тавьсан юм билээ.  Үүнээс гадна А.Галтбаярыг сурагчид нь анги хооронд шилжихэд мөнгө авсан  гэж байгаа юм билээ.  Үүнийг шүүх тогтоох байх.  Гэхдээ сургуульдаа ангиа сольсон тохиолдолд мөнгө авдаг байдал байсан бөгөөд энэ нь сургалтын төлбөрөөс нь хоёр дахин их байж ирсэн юм билээ. Энэхүү шийдвэр 1998 оны шийдвэр бөгөөд өнөөг хүртэл хэрэгжиж ирсэн. Тухайлбал, 2007 оноос хойш сургуульд 700-800 сая төгрөг сургуульд орсон байгаа юм.  Харин А.Галтбаяр хувьдаа нэг ч төгрөг аваагүй. Ер нь цаашид ийм байдлыг арилгах хэрэгтэй гэдэг асуудлыг тавьж байгаа".

МУИС-ын багш нарын холбооны тэргүүн Б.Болд-Эрдэнэ

"МУИС дээр өрнөж буй асуудал олон нийтийн анхаарлын төвд байна л даа.  Яг үнэндээ МУИС-ийн захирал А.Галтбаярыг хагас жилийн хугацаанд юу хийсэн гэдгийг оюутнууд хэлж байна шүү дээ.  МУИС-ийн захирал А.Галтбаяр шинэчлэл хийх лидер хүн биш.  Хийж байгаа ажил нь өнөөдрийн хүртэл тодорхойгүй байна.  Үүнээс гадна А.Галтбаярын өөрийнх нь томилсон 10 дэд захирал, сургалтын албаны эрхлэгч, тэнхимийн эрхлэгч нар А.Галтбаяртай хамтарч ажиллаж чадахгүй хэмээн Боловсролын яаманд бичиг хүргүүлсэн.  Тиймээс энэ асуудлыг яаралтай шийдэхгүй бол багш, сурагчид амраад явлаа шүү дээ.  Гэтэл 9 сарын 1-нд дахиад л бүх зүйл тодорхойгүй хэвээр байна.  Шинэчлэлийг яаж хийх ёстой гэхээр дээд боловсролын хууль, стандартаа өөрчилж, , их сургуулиудад бие даасан байдлыг нь өгөх хэрэгтэй байна. Гэтэл сургуулийн захиралыг нэг улстөрийн хүчин гарч ирэхээрээ өөрийнхөө хүнийг тавьдаг, тэр нь сургуулийн уламжлал болж ирсэн бүх зүйлийг үгүйсгэдэг байдал гардаг боллоо. Үүний дүнд багш, оюутнуудыг эрх ашиг л хохирдог.  Өнөөдөр манай удирдлагуудын ярьж байгаа шинэчлэлийг МУИС хоёр жилийн өмнө хийчихсэн.  Гэтэл тэр бүхнийг үгүйсгэчихээд хэдэн дарга нар сольж, тэнхим л нээж байна шүү дээ.  Жинхэнэ шинэчлэл бол сургуулийн хөтөлбөр болоод агуулга дээр л хийгдэх ёстой.  Түүнээс бүтэц, шат дамжлагыг өөрчлөөд сургалтын чанар сайжирна гэж байхгүй.  Хамгийн гол нь хөтөлбөрийн агуулга, баримт бичиг дээр л ажиллаж ёстой. Үүнээс гадна А.Галтбаяр захиралыг сурагчдын шилжилтээс мөнгө авсан гэж яриад байгаа. Энэ асуудал бол өмнө нь манай сургуульд байсан асуудал.  Хүүхэд шилжиж ирэхийг хязгаарлах зорилгоор шилжилтийн төлбөр гэж авдаг байсан юм.  Гэхдээ өнгөрсөн жил үүнийг больё гээд зогсоосон. Гэтэл өнгөрсөн намраас А.Галтбаяр захирал өөрөө дур мэдэж шилжилтийн төлбөрийг авсан.  Үүнийгээ тайлбарлахдаа  номын сан барих гэж байгаа гээд байгаа юм. Яг үнэндээ  номын сан барих зэрэг мөнгө санхүүгээ өөр газраас босгох ёстой. МУИС их гэх том айл өрхийг удирдаж байгаа хүн том бодлого, баримт бичиг дээр ажиллахаас биш сургуулийн шилжилтийн төлбөр, оюутны кредитийн төлбөр гэсэн асуудалд  илүү анхаарал тавиад байгаа нь учир дутагдалтай".
                                                                                                                                                                         Д.Ангараг