Өнөөдөр Соёл Спорт Аялал Жуулчлалын Яам БНХАУ-ын Соёлын өвийн удирдах газар хооронд Хэрлэн барс хотын суврагыг сэргээн засварлах талаар хамтран ажиллах тухай харилцан ойлголцлын санамж бичиг байгууллаа. Энэхүү санамж бичигт ССАЖЯ-ны Төрийн нарийн бичгийн дарга П.Алтангэрэл, БНХАУ-аас Монгол Улсад суугаа Элчин сайдын яамны Элчин зөвлөх Ян Чиндүн нар гарын үсэг зурав.

 

Энэ баримт бичгийн дагуу Дорнод аймгийн Цагаан-Овоо сумын Хэрлэн барс хотын суврагыг сэргээн засварлах төслийн зардлыг БНХАУ хариуцаж, ССАЖЯ төслийг хэрэгжүүлэхэд шаардлагатай бүх талын дэмжлэг туслалцаа үзүүлэхээр тогтжээ. Хятадын Соёлын өвийн удирдах газар болон Монгол Улсын Соёлын өвийн төв нь сэргээн засварлах ажилд оролцох судлаач, мэргэжилтнүүдийг сонгон шалгаруулж оролцуулах бөгөөд тогтвортой ажиллах нөхцөлөөр хангах юм байна. Төсөл хоёр жилийн дотор хэрэгжиж дуусах ажээ.