Дорнод аймагт орших "Петро Чайна" компанийн газрын тосны 21-р талбайн жолооч Б болон ойрын хавьтлын найман иргэнд хийсэн PCR шинжилгээний хариу сөрөг гарлаа.

Дээрх иргэдийг аймгийн БОЭТ-ийн Халдвартын тасагт тусгаарлаад байсан юм. Иргэн Б энэ сарын гуравны өдөр халуурч, хоолой нь өвдсөн гэсэн дуудлагын дагуу мэргэжлийн байгууллагууд газар дээр нь ажиллаж, нэг удаагийн түргэвчилсэн тестээр шинжлэхэд хариу нь сөрөг гарсан байна.

Иргэн “Б”-гийн хувьд хоолой нь өвддөг, хоёр хоногийн өмнө халууцаж хүйтэн ус уусан гэж өвчний асуумж авах үед мэдүүлсэн ч тухайн иргэн хилийн зоонд орж, тээвэрлэлт хийсэн учир Эрүүл мэндийн сайдын тушаалаар сэжигтэй тохиолдол буюу COVID-19-ийн халдвар авсан байж болзошгүй гэж үзэж, аймгийн Онцгой комиссын шийдвэрээр 21 дүгээр талбай руу орж гарах хөдөлгөөнийг түр хугацаагаар зогсоосон аж.

http://qwe.mn/

URL: http://www.choibalsan.mn/index.php?newsid=34335