АНУ-ын хууль тогтоогчид гаднын орны 25000 сувилагч, 15000 эмч, нийт 40000 эрүүл мэндийн ажилтанд өөрийн улсын иргэншил олгох ногоон карт олгох тухай хуулийн төслийг хэлэлцэж эхлээд байна.

АНУ-ын Конгрессын доод танхим болох Төлөөлөгчдийн танхимын олонхи буюу Ардчилсан намын гишүүд энэ долоо хоногт “COVID-19”-ийн халдварын тэргүүн эгнээнд ажиллах цагаач эрүүл мэндийн ажилтнуудад яаралтай ногоон карт олгох тухай хуулийн төслийг танилцуулсан.

Үүнээс өмнө Конгрессын дээд танхим болох Сенатын танхимын олонхи буюу Бүгд найрамдах намын гишүүд “Эрүүл мэндийн салбарын ажиллах хүчийг нөхөн сэргээх тухай хууль”-ийг боловсруулаад байсан юм. Уг хуулиар гаднын орны 40000 эрүүл мэндийн ажилтанд тус улсад байнга оршин суух, клиник тусламж, үйлчилгээ үзүүлэх эрх бүхий ногоон карт олгох аж. Хуулийн төслөөр 25000 сувилагч, 15000 эмчид ногоон карт олгох бөгөөд ингэснээр эрүүл мэндийн тогтолцооны хувьд харьцангуй сул хөгжсөн хөдөө орон нутагт эрүүл мэндийн ажилтан, мэргэжилтнүүдийн тоог зохих төвшинд хүргэхээр төлөвлөжээ.

Ардчилсан намын Сенатор Дик Дурбин энэхүү хуулийн төслийн талаар “Манай улсын эрүүл мэндийн салбарын нийт ажиллах хүчний зургаан хүн тутмын нэг нь гадаад улсад төрсөн хүмүүс байдаг. Үүнийг анхаарч үзэх хэрэгтэй. Цагаач эмч, сувилагч нар манай эрүүл мэндийн системд маш чухал үүрэг гүйцэтгэдэг. Цар тахлын энэхүү хүнд цаг үед тэдний хувь нэмэр урьд өмнөхөөсөө ч илүү чухал болжээ. Хэрэв эдгээр цагаач эрүүл мэндийн ажилчид байгаагүй бол бид өнөөдөр ямар нөхцөл байдалд байхыг төсөөлөхөд бэрх. Гэвч өнөөдөр АНУ-д хэдэн мянган эмч, сувилагч нар түр хугацааны визээр ажил эрхэлж байна. Тэдний заримд нь ногоон карт хаалттай. Энэ бол тэдний хувьд ирээдүйгээ эрсдэлд учруулан байж COVID-19-тэй тэмцэхэд бүх хүчээ гарган ажиллаж байгаа эр зоригийнх нь үүднээс хүлээн зөвшөөрөхийн аргагүй зүйл юм” гэх байр суурийг илэрхийлсэн байна.

Харин Йова мужаас сонгогдсон Төлөөлөгчдийн танхим дахь Ардчилсан намын гишүүн Эбби Финкенауэр “Йова муж шиг ихэнх хэсэг нь алслагдсан хөдөө орон нутагт хамаарах бүс нутгуудад эрүүл мэндийн тогтолцоо харьцангуй сул хөгжсөн тул өнөөгийн цар тахлын улмаас эрүүл мэндийн мэргэжилтнүүдийн хомстолд ороод байна. Бид энэхүү хямралыг даван гарахын тулд боломжит бүх зүйлийг хийх ёстой” гэжээ. 

О.Мөнхбат

Эх сурвалж: Healthleadersmedia 

URL: http://www.choibalsan.mn/index.php?newsid=34424