Төрийн үйлчилгээний машин буюу "ТҮЦ" машинаар дамжуулан иргэдэд олгож байгаа лавлагаа, тодорхойлолтыг арилжааны Хаан, Худалдаа хөгжил зэрэг банкууд хүчин төгөлдөр бус гэж үзэн үйлчилгээ үзүүлэхгүй чирэгдүүлж байгаа талаар иргэд Засгийн газрын 11-11 мэдээлийн төв болон Улсын бүртгэлийн ерөнхий газарт өнөөдрийг хүртэл гомдол гаргасаар байна. Иргэдийг чирэгдүүлэхгүй байх, гомдол саналыг шийдвэрлэх зорилгоор тус газар Монгол банк, Арилжааны банкуудад хандаж "ТҮЦ МАШИН"-аас олгогдож байгаа лавлагаа, тодорхойлолтыг үндэслэн иргэдэд төрийн үйлчилгээг саадгүй, түргэн шуурхай хүргэхэд дэмжлэг үзүүлж ажиллахыг хүссэн албан бичгийг тухай бүрт хүргүүлж, шаардлагатай бүхий л арга хэмжээг авсан ч уг асуудал нааштай шийдэгдэхүй л байна.

Мөн Засгийн газрын хэрэг эрхлэх газраас Монгол банкинд "ТҮЦ" машинаас гаргаж буй лавлагаа, тодорхойлолтоор үйлчилгээ үзүүлэхийг арилжааны банкуудад мэдэгдэж холбогдох ажлыг хамтран зохион байгуулж, хэрэгжүүлэхийг даалгасан боловч өнөөдрийг хүртэл дээрх банкууд иргэдэд үйлчилгээ үзүүлэхгүй байна гэх гомдол гарч байна. ТҮЦ машинаар дамжуулан олгож байгаа лавлагаа нь Улсын бүртгэлийн өрөнхий хуулийн 12,16 дугаар зүйл, 3асгийн газрын 2010 оны 37 дугаар тогтоолыг тус тус үндэслэн улсын бүртгэлийн нэгдсэн сангаас гарч байгаа өндөр технологийн дэвшил, нууцлал бүхий үнэт цаасаар хэвлэгддэг.

Тодруулбал, автомат машинаас гарч байгаа лавлагаа нь эрх зүйн хувьд улсын бүртгэлийн мэдээллийн нэгдсэн сангаас гарч байгаа архивын лавлагаа, тодорхойлолттой адил албан ёсны баримт бичиг бөгөөд төрийн үйлчилгээг тасралтгүй хүргэж байгаа үйлчилгээний нэг хэлбэр юм. Төрийн бодлого, үйл ажиллагааны зорилго, зорилтуудыг хэрэгжүүлэх, иргэдэд төрийн үйлчилгээг шуурхай, хүртээмжтэй хүргэх зорилтын хүрээнд хэрэгжүүлсэн энэхүү томоохон ажлын үнэлэмж, иргэдэд эрх тэгш хүрэх хүртээмж, бүтээмжийг нэмэгдүүлэхэд дээрх арилжааны банкуудын хамтын оролцоо, зохион байгуулалт чухал үүрэгтэй байна.

НИЙСЛЭЛ ТАЙМС

URL: http://www.choibalsan.mn/index.php?newsid=3504