Хэрлэн голын усанд дизель түлш ачсан ачааны машин гол бохирдуулсан талаарх зураг өчигдөр /2021-07-20/ цахим сүлжээнд тархсан. Дорнод аймгийн цахим сүлжээнд "Хэрлэн голыг минь бохирдуулж байна” гэх тайлбартай нийтэлсэн бөгөөд иргэдийн ихээхэн шүүмжилсэн юм.

Тэгвэл эх сурвалжийн мэдээллээр Хэрлэн гол мөн эсэхийг нь тогтоогүй байгаа, тухайн тээврийн хэрэгслийн улсын бүртгэлийн дугаар нь тод харагдахгүй байгаа учир мөрдлөгийн явцад хүндрэл учруулж байх магадлалтай гэлээ.

Тус асуудлаар Дорнод аймгийн Цагдаагийн газрын Нийтийн хэв журам хамгаалах хэлтсийн хэсгийн байцаагч Э.Баасанжав хэвлэлд өгсөн  тодруулгадаа "Цахим орчинд тарсан зураг, зөрчилтэй холбогдох шалгалтын ажиллагаа явуулах үүрэг чиглэл удирдлагаас авсан. Одоогоор Хэрлэн голын орчим газар нутаг мөн эсэх талаар тогтоохоор хяналт, шалгалтын ажиллагаа үргэлжилж байна. Үүнээс өөр дэлгэрэнгүй мэдээлэл өгөх боломжгүй” гэсэн байна.

---