Дорнод /МОНЦАМЭ/. Петро Чайна Дачин Тамсаг компанитай холбогдох байгаль орчны эсрэг гэмт хэргийн шалгалтын явц, шийдвэрлэлт бүтэн жилийн нүүр үзэн удааширч байна. Тодруулбал, өнгөрсөн онд мэргэжлийн байгууллага тус компанид шалгалт хийж, газрын тосны 19, 21-р талбайд хүрээлэн буй орчны эсрэг ноцтой зөрчлүүд үйлдэгдэж байгааг тогтоожээ. Шалгалтын дүнд үндэслэн Дорнод аймгийн Засаг дарга М.Бадамсүрэн тус компаниас 10 гаруй тэрбум төгрөг нэхэмжлэн, удирдлагыг нь Цагдаагийн байгууллагад шалгуулахаар өгсөн байдаг. Байгаль орчны эсрэг ноцтой эрүүгийн гэмт хэргийн улмаас учирсан хохирлыг барагдуулахаар өндөр хэмжээний мөнгөн дүн нэхэмжилсэн учраас тухайн үед аймгийн Цагдаагийн газрын харьяаллаас гаргаж, ЦЕГ-руу шилжүүлжээ. Ийнхүү ЦЕГ-ын Экологийн цагдаагийн албанд шалгагдаж байхад нь Хяналтын прокурор энэ оны долдугаар сарын 19-ний өдөр дээрх хэргийг хэрэгсэхгүй болгосон байдаг. Тиймээс тус аймгийн удирдлага энэ шийдвэрийг эсэргүүцэн, дээд шатны прокурорт гомдол гаргахад, өнгөрсөн сарын 10-нд хариу ирүүлэхдээ, гомдлыг үндэслэлтэй гэж үзэж, энэ хэргийг эргүүлэн Экологийн цагдаагийн албанд шилжүүлэн шалгуулахаар шийдвэрлэснээ мэдэгджээ. Гэсэн хэдий ч хэргийн хариуцагч, Петро Чайна Дачин Тамсаг компанийн Ерөнхийлөгч Жао Хун Фу цар тахлын үеэр эх орон руугаа оргон зайлсан юм.

 

Байгууллагын удирдлага нь ийнхүү эрэн сурвалжлагдаж байгаа ч Монгол Улсын Эрүүгийн хуулийн дагуу тухайн компани хариуцлага хүлээх ёстой. Байгаль орчны эсрэг ноцтой гэмт хэргийг хуулийн байгууллага шийдвэрлэж чадахгүй ийнхүү бүтэн жилийн нүүр үзэж байна.   

---