Бэлчээрийн ургамал 5 дугаар сарын 20-ны байдлаар Дундговийн нийт, Өмнөговь, Дорноговийн ихэнх, Баян-Өлгий, Ховд, Говь-Алтайн зарим сумдын нутгаар муу, Орхон, Дархан-Уул, Дорнодын нийт, Хөвсгөл, Хэнтий, Булган, Сэлэнгэ, Төвийн ихэнх, Увс, Завхан, Баянхонгорын зарим, Өвөрхангай, Өмнөговийн цөөн сумдын нутгаар хэвийн, бусад нутгаар дунд байна гэж Ус, цаг уур, орчны судалгаа мэдээллийн хүрээлэн мэдээллээ.

Энэ арав хоногт агаарын температур нийт нутгаар олон жилийн дунджаас 3.1-8.8 градусаар дулаан, хур тунадас нийт нутгийн 10 гаруй хувьд олон жилийн дунджаас ахиу, 80 орчим хувьд дунджаас бага оржээ. Салхины хурд тал, хээр, говийн нутгаар түр зуур 18-23 м/с хүрч, аюултай үзэгдэл болжээ. Ховдын Мөнххайрхан, Баянхонгорын Богд, Жинст, Сэлэнгийн Цагааннуур, Дундговийн Эрдэнэдалай, Сүхбаатарын Дарьганга болон Дорнодын Дашбалбарт 24-28 м/с хүрч, онц аюултай үзэгдэл болсон байна. 

URL: http://www.choibalsan.mn/index.php?newsid=37716