Ирэх хоёрдугаар сард нээлтээ хийх долоон бүтээлийг онцлон танилцуулъя. 

Романтик, инээдмийн жанрын тус кинонд Лэйни хэмээх бүсгүй жирэмсэн найздаа атаархан, улмаар эргэн тойрны хүмүүстээ өөрийгөө бие давхар болсон хэмээн худал хэлж итгүүлнэ. Ийнхүү хуурамч гэдэс зүүж, жирэмсэн болсон мэт жүжиглэх явцдаа Лэйни мөрөөдлийнхөө залуутай учирснаар ээдрээтэй үйл явдлын эхлэл тавигдана.

“Kinda pregnant” киноны гол дүрд Брианна Хоуи болон жүжигчин Эми Шумер нар тогложээ. Харин продюсерын үүргийг хөгжилтэй, хошин дүрүүдээрээ алдартай жүжигчин Адам Сэндлер гүйцэтгэсэн байна.

“Melo movie” /2025.02.14/

Зохиолч И На Ины ээлжит бүтээл болох “Melo movie” цуврал Валентины баяраар үзэгчдийн хүртээл болохоор болжээ. Энэхүү цувралд жүжигчин Чой Ү Шиг болон  жүжигчин Пак Бу Ён нар дүр бүтээсэн байна.

Үйл явдалд мелодрам төрлийн кино хийхийг мөрөөддөг оюутан бүсгүй Ким Мү Бэ болон түүнд дурласан залуу Кү Гём-ийн тухай өгүүлнэ. Гэвч Кү Гём бүсгүйд сэтгэлээ илчсэнийхээ дараа ор сураггүй алга болно. Уг үйл явдлаас хэдэн жилийн дараа бүсгүй алдартай кино найруулагч болсон байх бөгөөд түүний бүтээсэн шинэ киноны нээлт дээр Кү Гём гэнэтхэн гарч ирснээр цуврал цааш үргэлжилнэ.

“The white lotus-3” /2025.02.16/

“HBO Max”-ын хамгийн алдартай бүтээлүүдийн нэг болох “The white lotus” цувралын гуравдугаар бүлэг үзэгчдийн хүртээл болоход бэлэн болжээ. Бүлэг бүр дээрээ тансаг зочид буудалд амарч буй баячуудад тохиолдох сонирхолтой, адал явдалт өөр, өөр түүхийг өгүүлдэг тус цувралын шинэ бүлгийн үйл явдал Тайланд улсад өрнөх болно. Тэр ч утгаараа Тайланд улсаас гаралтай дуучин, “Blackpink” хамтлагийн Лиса гуравдугаар бүлэгт дүр бүтээсэн байна.

“My dearest Nemesis” /2025.02.17/

“Black salt dragon” хэмээх вебтүүнээс сэдэвлэн бүтээсэн энэхүү цувралын гол дүрд залуу жүжигчин Чой Хён Үг, Мүн Га Ён, Им Сэ Ми нар тогложээ. Үйл явдал видео тоглоомд дуртай ч түүнийгээ нуудаг томоохон компанийн гүйцэтгэх захирал Бан Жү Ён гэх залуу 16 жилийн дараа анхны хайртайгаа дахин учирснаар эхэлнэ.

“Suits: L.A.” /2025.02.23/

2011 онд үзэгчдийн хүртээл болж байсан “Suits” цуврал 2023 онд “Netflix” платформд тавигдсанаар дахин анхаарлын төвд орсон юм. Тэгвэл “Suits: L.A.” цуврал хоёрдугаар сарын 23-ны өдрөөс NBC сувгаар цацагдах бөгөөд үйл явдал энтертайнмент хэргүүд дээр ажилладаг “Black lane law” хэмээх хуулийн фирмийн эргэн тойронд өрнөнө. Хуулийн фирмийн эзэн Тед Блэкийн дүрд жүжигчин Стивен Амелл тогложээ.

“Last breath” /2025.02.28/

Жүжигчин Вуди Харрельсон, Симу Лю, Финн Коул нарын тоглосон триллер төрлийн тус киног 2019 онд гарсан ижил нэрт баримтат киноноос сэдэвлэн бүтээжээ. 2012 онд болсон бодит явдлын тухай “Last breath” кинонд далайн гүнд алга болсон хамтрагчаа аврахын тулд бүхий л чадлаараа хичээж буй мэргэжлийн шумбагч багынхны тухай өгүүлнэ.

“Mickey 17” /2025.02.28/

Найруулагч Бун Жүн Хугийн ээлжит кино “Mickey 17” уран бүтээлээ зохиолч Эдвард Эштоний “Mickey 7” нэртэй номоос сэдэвлэн бүтээжээ. Гол дүрүүдэд Роберт Паттинсон, Наоми Акки, Стивен Юн, Тони Коллет, Марк Руффало нар тоглосон юм.

Мики Барнс хэмээх залуу “Нифлхайм” гарагийг колоничлох багт сонгогдож, амь өрссөн даалгаврыг биелүүлэх шаардлагатай нүүр тулж буйгаар үйл явдал эхэлнэ. Хэрэв даалгавраа биелүүлэх үедээ амь үрэгдвэл түүний ой санамжийг салган авч, биеийг нь клоны аргаар хувилан, дахин дайны талбар руу илгээдэг аж. Ийнхүү Мики Барнс долоо дахь удаагаа үхэж, дахин сэргэхэд өөрийнхөө төсөөлөөгүй зүйлтэй нүүр тулж буйгаар кино цааш үргэлжилнэ.