Төрийн есөн хөлт цагаан тугийг Төв цэнгэлдэх хүрээлэнд залж, Тулгар төрийн 2223, Их монгол улсын 808, ардын хувьсгалын 93 жилийн ой, Үндэсний их баяр наадмын нээлт албан ёсоор эхэллээ. Монгол Улсын Ерөнхийлөгч Цахиагийн Элбэгдорж наадмыг нээж үг хэллээ. Тэрээр,

Өргөн олон наадамчид аа, эрхэмсэг хатагтай ноёд оо, хүндэт зочид гийчид ээ!

Өнгөрснөөс өвлөж ирсэн, өнөөдрөөр дэвжин цэцэглэх өрнөх, ирээдүйд мандан босох, гурван цагийн алтан аргамж Монгол наадмын хоймор, эх орныхоо голомт улсын нийслэл Улаанбаатараас нийт иргэд наадамчин олондоо үндэсний их баяр наадмын халуун мэндчилгээг өргөн дэвшүүлье.

Цэлмэг хөх тэнгэр, ноён оргил уулс, өргөн тал хөндий, хангай говь, мөрөн голууд хосолсон монголын сайхан эх оронд маань өвсний шим жигдэрч, өнгөтэй сайхан дэлгэр цаг тохиож байна.

Газар газрын Монгол наадам хийморь бахархал дүүрэн эхэлж байна. Үндэсний их баяр наадам бол Монгол түмний халуун түүх, гэгээн хүсэл, хамтын хүчийг илтгэсэн язгуур эрдэнэ билээ.

Дэлхийд төрийн дэг, хуулийн засаглал, ёс журам тогтоож явсан өвөг дээдсийн маань харвасан сумны илч хариагүй, унасан хүлгийнх нь шанадас аргамаг, зоригт баатруудынх нь сүр хүч хэвээр байгааг энэ цагийн монгол наадам уламжлан харуулдаг.

Монгол хүн бүр байгаа газар бүрт Монгол наадмын өнгө гийж, уламжлал соёлоо дээдэлж, урагшлах холбоог илтгэсэн сайны билэгт яриа өрнөж байна. Энэ мөчид эх орныхоо дөрвөн зүг, найман зовхист суугаа ард түмэндээ мөн хилийн чанадад олон хэлийн оронд наадамлаж буй иргэддээ бүгдэд нь ажил хөдөлмөрийн амжилт, бүтээл туурвилын эрчим, сайн сайхны ерөөлийг өргөе.

Монгол төрийн их шүтээн есөн хөлт цагаан тугийнхаа өмнө эрхий мэргэн харваачдын маань цэц мэргэн, аргамаг шандаст хүлгийн сойлго төгс, хүчит бөхчүүдийн бяр даацтай, мэх уран, шагайн харвааны оноч дүүрэн байхыг ерөөе.

Саяхан ард түмэндээ уламжилсан нэгэн уриалгыг энд давтан хэлье.

Морьтон монголчууд аа, морио унацгаая аа! Хурдыг эзэмшиж, адууны соёлын амьд дархлааг тээсээр яваа Монгол хүн бүр морьтон уламжлалт соёлоороо бахархацгаая, гайхуулцгаая.

Морио унаж эдлэе, морьтойгоо малаа хариулья. Морьтойгоо наадамлая, Монголчууд аа!

Морь бол монгол түмэнд заяасан дээд хувь тавилан юм. Мянга мянганы хатираанд хүн төрөлхтөний түүхэнд онцгойлон мандсан монгол түмний бахархал Монгол наадам ийнхүү эхэлж байгааг даяар олноо дуурсган зарлая аа.

Зол хийморь нь босоо сайхан наадаарай, хурай хурай хурай хэмээн наадмыг нээлээ.

Төв цэнгэлдэх хүрээлэнд "Монгол цэргийн жавхаа-2014" уралдааны тэргүүн байр эзэлсэн анги, нэгтгэлүүдийн жагсаал болов.  Монголын спортын алдартнууд Есөн хөлт цагаан тугандаа хүндэтгэл үзүүлсний дараа соёл урлагийн тоглолтоор наадмын нээлтийн ажиллагаа үргэлжилж байна.